15 қазан күні Шахтинск қаласында «Qarmet» қызметкерлері мен жергілікті тұрғындарды бопсалаған қылмыстық топ қолға түсті, деп жазады Egemen.kz.
ІІМ мәліметінше, ұсталғандардың басым бөлігі жастар болып шыққан. Сондай-ақ қылмыстық топ құрамында аралас жекпе-жек жаттықтырушысы да бар екені анықталды.
Бұған дейін Теміртау, Саран, Абай қалаларында ауыр қылмыстарға, сонымен қатар «Qarmet» АҚ объектілерінен тауарлық-материалдық заттарды ұрлауға және кәсіпорын қызметкерлерін бопсалауға қатысы бар басқа да қылмыстық топтардың қатысушылары ұсталған болатын.
Осы фактілер бойынша ішкі істер органдарына 100-ден астам күдікті жеткізіліп олардың 39-ы қамауға алынған. 150-ге жуық тінту шаралары жүргізілген. Қару-жарақ пен оқ-дәрілер, сондай-ақ басқа да заттай дәлелдемелер тәркіленген.
«Ауыр қылмыстардың 16 эпизоды бойынша үш қылмыстық іс сотқа жіберілді. Криминалдық топтардың жолын кесу нәтижесінде өңірде 30-дан астам атыс және травматикалық қару, оқ-дәрілер тәркіленді. Өңірлерде құқықтық тәртіпті қамтамасыз ету бойынша жұмыс жалғасып жатыр», деді ІІМ ұйымдасқан қылмысқа қарсы күрес департаменті өкілі Қуандық Алпыс.