Ұлттық мереке – Республика күні қарсаңында «AMANAT» партиясы Орталық аппаратының ғимаратында көлемі 24-те 12 метрді құрайтын Мемлекеттік Ту ілінді, деп хабарлайды Egemen.kz.
«Amanat» партиясының баспасөз қызметінің мәлім етуінше дәл осындай көлемді Ту ғимараттың қасбетіне алғаш рет ілініп отыр. Партиялықтардың айтуынша, аспан түстес Көк байрақ адамдардың бойында патриотизм мен өз еліне деген мақтаныш сынды ең ізгі сезімдерді оятады.
«Amanat» партиясының «Жастар Рухы» жастар қанаты осымен 3 жыл қатарынан Қазақстан Республикасының Мемлекеттік Туын насихаттауға бағытталған «Менің Елім – менің Туым» акциясын өткізіп келеді. Биыл акция аясында ел аумағында 10 мыңнан астам Мемлекеттік Ту ілінеді. Оған депутаттар, қоғам қайраткерлері, белсенді жастар және барша ниет білдіруші адамдар қатысады.
«Жастар Рухының» төрағасы Ақерке Искандерова бұл акция 1990 жылғы 25 қазанда қабылданған мемлекеттік егемендік туралы Декларация Тәуелсіздігіміздің бастауы болғанын еске салуға арналғанын атап өтті.
«Белсенділеріміз ел аумағындағы тұрғын үйлер мен әлеуметтік нысандарға Көк байрағымызды іліп жатыр. 25 қазанға дейін бас-аяғы 10 мыңнан астам Ту ілу жоспарланып отыр. Аталған акцияның басты мақсаты – ел азаматтары арасында патриоттық сезімді ояту. Мемлекеттік Туымызға қараған сайын кеудемізді өз елімізге деген мақтаныш сезімі кернейді. Біз Туды «AMANAT» партиясының ғимаратына ілдік. Ол түрлі мәдени іс-шараларда, ұлттық құрамаларымыздың матчтарында, тіпті жуырда 5-ші Дүниежүзілік көшпенділер ойындары аясында өткен Димаш Құдайбергеннің концертінде желбіреді. Көк байрағымыз елорданың қақ ортасында 25 қазанға дейін ілініп, ел тұрғындарын қуантады», деді ол.
Айта кетсек, акцияға барлық ниет білдірушілер қатыса алады. Ол үшін әлеуметтік желілерде #republicday #меніңтуым, #меніңелімменіңтуым хэштегтерімен Мемлекеттік Ту аясында түскен өз фотосуретіңізді немесе отбасыңыздың фотосуретін орналастыру жеткілікті.