Еліміздің әлеуметтік-гуманитарлық дамуындағы аса үздік жетістіктері үшін «Қазақстанның Еңбек Ері» атағын алған қос ұстаздың бірі – Орал қаласындағы Асан Тайманов атындағы №34 мектеп-гимназиясының мұғалімі Эльмара Траисо-ва.
Эльмара Асқарқызы Орал облысының Жымпиты ауылында дүниеге келген. Тарас Шевченко атындағы Орск мемлекеттік педагогикалық институтының филология факультетін бітірген маман содан бері орыс тілі мен әдебиеті пәнінің мұғалімі болып қызмет етіп келеді.
Болашақ еңбек ері ұстаздық жолын ауылда, Жымпиты орта мектебінде бастаған. 2000 жылы Орал қаласына ауысып, әуелі №37 мектепте, кейін №5 мектепте қызмет етті. Ал 2007 жылдан бүгінге дейін Асан Тайманов атындағы №34 мектеп-гимназиясында орыс тілі мен әдебиеті пәнінің мұғалімі болып жұмыс істеп келеді. «Педагог-зерттеуші» дәрежесіне жеткен ұстаздың жалпы педагогикалық өтілі – 34 жыл.
Эльмара Асқарқызы Қазақстан Республикасы филологтерінің «Қазақстанда филологиялық білім берудің негізгі жолдары» тақырыбында өткен бірінші сьезіне делегат болып қатысты. Облыс көлемінде «Жас театр көрермені» әдеби драма үйірмесінің бағдарламасын құрастырды. Облыс көлеміне 10-сыныптарға арналған «Пушкиниана» қолданбалы курсы іс-тәжірибесі таратылды.
Мұғалім Батыс Қазақстан облысы мен Орал қаласында өткен пән олимипиадаларына, байқауларға әділқазы ретінде қатысып келеді. «Орыс тілі» мен «Орыс әдебиеті» оқулықтарын талдауға арналған Ғылыми Республикалық білім беру орталығында эксперттік комиссия мүшесі. Облыстық шығармашылық топ құрамында 5-11 сыныптарға арналған орыс тілі мен әдебиеті пәнінен тақырыптық-күнтізбелік жоспар құрастыруда облыс мұғалімдеріне әдістемелік көмек көрсетеді.
Эльмара Асқарқызының оқушылары жыл сайын Орал қалалық, Батыс Қазақстан облыстық, тіпті республикалық сайыс, олимпиадаларда жүлдегер, жеңімпаз атанып жүр.
Атап айтар болсақ, 2019-2020 оқу жылында республикалық ғылыми жоба сайысында 11 сынып оқушылары Н.Ғабдулғазизова мен З.Төлемісова қалалық деңгейді – І орын, облыстық деңгейде – ІІ орынға ие болды. «Поэзия души Пушкина» атты мәнерлеп оқу сайысында Н.Ғабдулғазизова республикада жеңімпаз атанды. Эссе байқауында З.Төлемісова республикада ІІ орын алды.
Бұдан бөлек, республикалық «Театрдың ғажайып әлемі» конкурсында Э.Траисова баптаған оқушылар тобы қалалық деңгейде де, облыстық деңгейде де І орынға ие болды. 10-сынып оқушысы А.Нұрланұлы «Үздік ер адам рөлі» атағын иеленсе, Н.Ғабдулғазизова «Үздік актерлік орындаушы» атағымен марапатталды.
Мақтаулы мұғалімнің шәкірттері халықаралық байқауларда да биіктен көрініп жүр. 2020-2021 оқу жылында халықаралық орыс тілі пән олимпиадасында Г.Асқарова, М.Жантөлина «Алтын сертификатқа» ие болды.
Осындай жүйелі жетістіктері үшін Эльмара Асқарқызының өзі 2016 жылы республиканың «Үздік педагогі» атанған болатын. Оның есімі «Лучшие люди, лучшие в образовании» атты халықаралық энциклопедия жинағына енген.
«Эльмара Асқарқызы – болашақта да шығармашылық жұмысын толықтырып, оқушыны жеке тұлға ретінде қалыптастыруға барын салатын жаңашыл, ізденімпаз мұғалім», дейді әріптестері.
Байқағанымыздай, Эльмара Асқарқызының шәкірттері театр өнерін ерекше қадірлейді. Бұл оқушының бойына ұстаздың ұлағатымен сіңген құбылыс. Өткен 2022-2023 оқу жылында ғана Э.Траисованың шәкірті А.Ислям «Театрдың ғажайып әлемі» атты республикалық фестиваль-байқауының «Екінші пландағы үздік рөл» номинациясы бойынша жеңімпаз атанды. Республикалық ғылыми жобалар жарысына қатысқан А.Айбасова «Театр уж полон...» тақырыбында қалалық кезеңінде – І орын, облыстық кезеңде – ІІ орын алып, республикаға жолдама жеңіп алды. Ал 5-сынып оқушылары С.Қилау, А.Исмағұлова, А.Бисенғалиев, З.Холматова облыстық «Табиғатты аяла» жас өлкетанушылар форумында «Экотеатр» номинациясы бойынша І орын иеленді. «Театрдың ғажайып әлемі» театр өнерінің қалалық фестиваль-байқауында Асан Тайманов атындағы №34 мектеп-гимназиясының «ТЮЗ» командасы ІІ орын иеленді.
«Театрды сүйетін, әдебиетке құмар жас өрен зиялы азамат болып қалыптасады. Елдің болашағы – осындай өрелі жастар» дейді Қазақстанның Еңбек Ері.
Батыс Қазақстан облысы