Райымбек ауданындағы Көмірші аулында бүгінгі таңда 600 адам тіршілік етеді. Олардың 128-і мектеп оқушысы болса, 65-і зейнет жасындағы қарт кісі. Осы бір алақандай ғана ауылда биылғы жылы тың бастамалар мен жаңа жобалар жүзеге асып, мұндағы халықтың көңіл күйіне соны серпін берді. Соның бірі – жақында ашылған медициналық пункт.
Ауыл тұрғындарының денсаулығы мен әл-ауқатын жақсарту мақсатында ел игілігіне берілген бұл нысан «Amanat» партиясының сайлауалды бағдарламасы аясында жүзеге асырылды. Жалпы құны 118 239 464,34 теңгені құрайды.
«Көміршіге келін болып түскеніме 40 жыл болды. Осы уақыт ішінде арнайы медициналық ғимарат тұңғыш рет салынып отыр. Бұған дейін ауылдағы мекемелердің бір бұрышын паналап қызмет көрсететін едік. Енді, міне, жарқыраған ақ сарайдай ғимаратта еңбек ету бақыты бізге де бұйырды. Мұндағы жайлылық сырқаттанып келген адамның да көңілін серпілтеріне сенімдіміз. Ауыл тұрғындарының жағдайын ескеріп, осындай нысан сыйлаған ел азаматтарына алғысымыз шексіз», дейді мейірбике Мираш Әбділдаева.
Айтса айтқандай, көміршіліктердің қазіргі қуанышында шек жоқ. Ғимарат заманауи талапқа сай жабдықталған. Тіпті медицина қызметкерлерінің ақ халатын жуып, үтіктеп алуына қажет автоматты кір жуу машинасы мен үтікке дейін қарастырылған. Мұнда ақ желеңді 3 маман тұрғындарға қалтқысыз қызмет көрсетеді.
Медициналық пункттің жобаланған аумағы 3000 шаршы метрді қамтиды. Көгалдандыру жұмыстары да толық аяқталған медпункт жайлы бөлмелерімен, заманауи инфрақұрылымымен ерекшеленеді. Мұнда орта медицина қызметкерлерінің кабинеті, егу кабинеті, процедуралық, акушерлік қабылдау кабинеті, мүгедектер мен басқа да келушілерге арналған санитарлық тораптар, дәріхана пункті, қызметкерлерге арналған гардероб және жуу бөлмелері, сондай-ақ медициналық қалдықтарды уақытша сақтау, құралдарды дезинфекциялау мен дайындау бөлмелері бар. Мамандар медпунктте алғашқы көмек көрсетуге, диспансерлік есепте тұратындарға тағайындалған дәрі-дәрмек те жеткілікті екенін айтады.
Медициналық нысан орталықтандырылған су мен жылу жүйесіне қосылған. Бұл – ауыл тұрғындарына алғашқы медициналық көмек көрсетуді жақсартумен қатар, аймақтағы денсаулық сақтау қызметінің сапасын арттыра түскенін аңғартып отыр.
«Биыл аулымызға айрықша көңіл бөлініп, табысты жыл болып отыр. Жеке кәсіпкер өзінің қаржысына хатымхана салып беріп, қазан айының ортасында пайдалануға берсе, енді, міне, еңселі медпункт ашылды. Көмірші аулының көшелері асфальтталып, жарық тартылып, мектеп жөндеуден өтіп, қат-қабат игі істердің жүзеге асып жатқанына қуаныштымыз. Ауылдың инфрақұрылымының осылайша жаңғырып, жақсара түсуі, ең алдымен, жастарымыздың туған жерінде тұрақтауына, тіршілік етуіне ықпал етері сөзсіз», дейді ауыл тұрғыны Дәурен Сұлтанбайұлы.
Алматы облысы