Л.Н.Гумилев атындағы Еуразия ұлттық университетінде Жошы ұлысының 800 жылдығына арналған «Қазақ мемлекеттілігі: бастаулары, тарихи сабақтастығы және эволюция» атты халықаралық ғылыми-теориялық конференция өтті. Мазмұнды іс-шара тарих ғылымдарының докторы, профессор Сатай Сыздықовтың 70 жылдық мерейтойына орай ұйымдастырылды.
Түркі қағанатынан бастап, қарахан, қарлық, оғыз және қыпшақтардың тарихын індете зерттеп, тарих ғылымына сүбелі олжа салған ғалымның бүгінге дейін 20-дан аса монографиясы, 200-ге жуық ғылыми мақаласы жарық көрген. Әсіресе тарихшының «Қарлық-Қарахан мемлекетінің тарихы», «Қарқаралы-Қазылық», «Абай және ұлы дала тұлғаларының мұралары: өркениеттік сабақтастық» атты еңбектерін аузы дуалы ғалымдар жоғары бағалаған.
Конференция мерейтой иесін құттықтаумен басталды. Алдымен Ғылым және жоғары білім министрлігінің өкілі министр Саясат Нұрбектің құттықтау хатын оқып берді. Одан кейін Л.Н.Гумилев атындағы Еуразия ұлттық университетінің ректоры, академик Ерлан Сыдықов пен «Қазақ газеттері» ЖШС бас директоры, академик Дихан Қамзабекұлы ізгі лебіздерін білдірді. Ал Парламент Мәжілісінің депутаты, профессор Еркін Әбіл Жошы ұлысының бос жерден пайда болмағанын айта келіп: «Оның негізін Түркі мемлекеттері қалады. Осы Түркі мемлекеттерін зерттеуге барлық саналы ғұмырын арнаған ғалымның бірі – Сатай Сыздықов. Сондықтан ұлттық санамызды қалыптастыратын осындай тағылымды іс-шараның ғылыми ғана емес, саяси да мәні бөлек», деп тарихшының тың ізденістеріне тоқталды. Іс-шараға алыстан ат арытып келген Тәжікстан ұлттық университетінің доценті Рахмоил Сафаров бастаған делегация өкілдері ғалымның Қарлық мемлекетінің тарихын зерттеген еңбегіне лайықты баға беріп, мерейтой иесінің иығына шапан жапты. Ал конференция барысында ғалымдар пленаралық және секциялық мәжіліске бөлініп, байыпты баяндамалар жасады. Сондай-ақ іс-шара аясында Сатай Мақсұтұлының «Қазылық» атты төрт томдығы таныстырылды.