«Қазақ газеттері» серіктестігінде «Egemen Qazaqstan» газетінің аға тілшісі, биыл «Болашақ» бағдарламасымен Англияның Ланкастер университеті Қытай орталығында тағылымдамадан өтіп келген Гүлнар Жолжанның «Қазақ-қытай байланысы: «Бір белдеу, бір жол» мегажобасының барысы туралы» атты семинары өтті.
Әріптесіміз бұған дейін Англияның Ньюкасл университетінің магистратурасында білім алған кезде де ғылыми бағытқа ден қойған. Былтыр тағылымдамаға түсер кезде газетіміздің саясат және құқық бөлімінде қызмет етуіне байланысты зерттеу тақырыбы ретінде саяси бағытты, атап айтқанда, Қазақстан мен Қытай арасындағы байланысты таңдаған еді. Соның ішінде екі мемлекетке тікелей қатысы бар «Бір белдеу, бір жол» мегажобасына тоқталған.
Бұл жобаның бастау алғанына 10 жылдан асып барады. 2013 жылы елімізге жұмыс сапарымен келген Қытай төрағасы Си Цзиньпин Назарбаев университетінде аталған жоба туралы мәлімдегені белгілі. Негізінен Қытай мен Еуропа арасын жалғайтын ірі жобаның алғашқы аяқалысы біздің жерімізден бастау алды. Осы жөнінде әңгімелеген әріптесіміз былтыр жобаға 10 жыл толғанын, соған орай халықаралық сарапшылар оның нәтижелері мен жетістіктері туралы баяндады.
– «Бір белдеу, бір жол» аясында 200-ден аса жобаны іске асыру көзделген. Олар әлемнің 152 елін қамтымақ. Оның ішінде біздің мемлекетімізде әу баста 52 жоба іске асады деп күтілген еді. Бүгінге дейін әзірге 17-сі ғана нақты іске асты. Соның ішінде ең алғашқысы – Цзянсу провинциясының Ляньюньган қаласында Қытай-Қазақстан халықаралық логистикалық базасының салынып, жұмысын бастауы, – деп атап өтті спикер.
Г.Жолжанның айтуынша, халықаралық сарапшылар бұл мегажобаның Қазақстанда сәтті жүзеге асқанын айтып келеді. Ал Малайзия, Индонезия секілді кейбір мемлекеттерде ол үлкен дау туғызып, Қытай бұл елдерден бас тартқан. Осы тұрғыдан алғанда, көптеген маман Қазақстанды Қытайдың ұйытқы болуымен бастауын алған ірі жобадағы басты ел санайтынын жеткізді.
Семинар барысында мегажобаның тек экономикалық қана емес, саяси тұстары мен нәтижелері, оның әлем елдеріне, соның ішінде біздің мемлекетімізге әкелген пайдасы жөнінде кеңінен сөз болды.
– Ғылыми жұмысымның жетекшісі, Ланкастер университеті Қытай орталығының директоры Эндрю Чаб – Қытайды зерттеп жүрген белгілі ғалымдардың бірі. Біз Қазақстан мен Қытай арасындағы қарым-қатынас қырларын бірге зерттейміз деп шешіп, осы бағыттың көкейкесті мәселелеріне тоқталдық. Бұл жайында көп зерттеу мәліметін жинадым. Оның бәрі алдағы уақытта жарық көріп, оқырман қолына тиеді деп үміттенемін, – деді Г.Жолжан.
Семинарда қатысушылар жас зерттеушіге Ұлыбританияның оқу жүйесі, мәдениеті, қоғамдық ерекшелігі туралы сұрақ қойып, тұшымды жауап алды.