Абай облысындағы 9-сынып оқушысы Жеңіс Божаев күн энергиясын пайдаланудың тиімділігін арттыратын инновациялық жоба жасады.
Зерделі жеткіншектің жобасы көмірге, отынға және электр энергиясына тәуелділікті азайтып, экологияға зиянды әсерді төмендетеді. Бұл үшін ол алдымен күн коллекторының сызбасын әзірлеп, бөлшектерден қондырғыны құрастырудан бастаған.
«Коллекторды құрастыру кезінде ағаш каркас пен пеноплекс жылу изоляциясын қолдандым. Осылайша, жүйенің қос қабатты шыны арқылы герметикалық тығыздығын қалыптастырдым. Жылу аккумуляторы ретінде арнайы ыдысты қолдана отырып, тиімділігін сынақтан өткіздім. 0,33 м² көлеміндегі коллектор құрылғысы 30°C температураға дейін қызу беріп, күні бойы 2 142 000 Дж энергия жинай алатынын көрсетті. Жобаны іске асыру арқылы туған жерімнің экологиясын жақсартуға үлесімді қосқым келеді», дейді жас өнертапқыш.
Оқушының айтуынша, күн коллекторы арқылы тұрмыстық ғимараттарды жылыту мен ауыл шаруашылығына қажет суды қамтамасыз етуге болады. Ауыл шаруашылығы үшін 30–90°C аралығындағы су қажет екенін ескерген ол бұл жүйенің аймақ жағдайын жақсартуға септігін тигізетініне сенімді.
Қазір аталған құрылғы сынақтан өтті. Оның есептеуінше, 23 м² аумақты қамтитын күн коллекторы арқылы орташа үй ішін жылытып, ыстық сумен қамтуға болады. Бір жағынан, мұндай құрылғыны үйдің төбесіне орналастыру өте тиімді.