Оңтүстік Корея компаниясы Батыс Қазақстан облысына 81 млрд теңгеден астам инвестиция салуды жоспарлап отыр. Бұл туралы Батыс Қазақстан облысы әкімінің баспасөз қызметі хабарлады.
Астана қаласында жаһандық инвестиция бойынша өткен «KGIR-2024» дөңгелек үстел жиынында өңір басшысы Нариман Төреғалиев инвестиция тарту және бизнеске қолайлы жағдай жасау Мемлекет басшысы айқындаған негізгі басымдық екенін атап өтті. Сонымен бірге, бұл басқосудың әлеуетті инвесторлармен танысуға, оларға өңірдің инвестициялық мүмкіндігін көрсетуге жағдай жасап отырғанын айтты.
«Батыс Қазақстан облысында инвесторларға барлық қажетті жағдайды – қолайлы климат, дамыған инфрақұрылым мен қуатты өнеркәсіптік, логистикалық әлеует жасап отырмыз. Өңірде жоғары технологиялық өндірістер ашылып жатыр. Бұл біздегі нақты экономикалық әлеует пен тұрақтылықты көрсетеді», деді Нариман Төреғалиев.
Әкімнің айтуынша, кейінгі үш жылда облыстың негізгі капиталына 1,6 трлн теңге инвестиция құйылған. Соның 645,6 млрд теңгесі 2023 жылдың еншісінде. Бұл алдыңғы көрсеткіштерден 16,4 пайызға жоғары.
«KGIR-2024» басқосуының маңызды оқиғасы – БҚО әкімдігі мен оңтүстік кореялық «Hyundai Solar KZ 777» компаниясы арасында меморандумға қол қою болды. Компания өңірде төрт жобаны жүзеге асыру мақсатында 81,4 млрд теңге инвестиция әкелуді жоспарлап отыр. Бұл 120 жаңа жұмыс орнын құруға мүмкіндік береді. Жоспарланған жобалар қатарында қалдықтарды өңдеу және өртеу кешені, жылыжай кешені, күн панельдерінен электр қуатын өндіретін станса құрылысы бар. Бастамалар 2024-2026 жылдарға жоспарланған.
Батыс Қазақстан облысы