Ауа райының күрт нашарлауына байланысты Төтенше жағдайлар департаментінде жедел штаб құрылды, деп хабарлайды Egemen.kz.
Хромтау ауданына қарасты Абай ауылы маңында 2 ер адам ауа райының қолайсыздығына қарамастан мал тексеруге кетіп, қарда тұрып қалған.
Дереу жеткен құтқарушылар қар құрсауында тұрып қалған жеңіл автокөлігін эвакуациялап, хабар берушілерді құтқарды. Оған қоса, қайтар жолда дәл солай қарда тұрып қалған жеңіл көлікті байқап, тағы 2 адамды эвакуациялаған. Тұрғылықты жеріне жеткізілген азаматтар медициналық көмекке мұқтаж болмаған.
Ауа райының қолайсыздығына қарамастан мал жаюға шығып, байланысқа шықпай қалған 1959 жылы туған ер адамды іздестіру-құтқару жұмыстарының нәтижесінде облыс орталығының Құршысай тұрғын алабынан 8 шақырым жерде құтқарушылар боран салдарынан бағдарынан айырылған адамды тапты. Ол медициналық көмекті қажет етпеген.
Жалпы айта кетсек, өткен тәулікте Ақтөбе облысында ауа райының нашарлауына байланысты ТЖД бөлімшелері 23 рет жолға шығып, оған 200-ге жуық қызметкер мен 40-тан астам техника тартылған. Нәтижесінде 6 адам құтқарылған, оның ішінде 2 бала, 5 адам, оның ішінде 1 бала эвакуацияланды. 42 адам қауіпсіз жерге жеткізілді.