Астанадағы Кеңес Одағының батыры, Халық қаһарманы, армия генералы Сағадат Нұрмағамбетов атындағы әскери колледждің құрылғанына 25 жыл толуына орай іс-шара өтті. Әскери оқу орнының тәрбиеленушілері мен педагогтерін құттықтауға Қорғаныс министрлігінің, ведомствоның құрылымдық бөлімшелерінің, әскери прокуратураның, әскери оқу орындарының өкілдері келді.
Іс-шара еліміздің бірінші Қорғаныс министрі Сағадат Нұрмағамбетовтің бюстіне гүл шоқтарын қойып, батырды бір минут үнсіздікпен еске алуымен басталды. Халық қаһарманы, отставкадағы генерал-лейтенант Бақытжан Ертаев жиынды ашып, осы жылдар ішінде 1 700-ден аса түлек шыққан білім ордасының құрылу тарихы туралы айтты.
Қорғаныс министрінің орынбасары, генерал-майор Шайх-Хасан Жазықбаев әскери колледж ел Қарулы күштерінің кіші буын командирлерін даярлаудың негізгі ордасы деп атап өтті.
«Бөлімшелердегі әскери тәртіптің жағдайы, жауынгерлік дағдылар мен жеке құрамның моральдық-жауынгерлік рухы сержанттардың кәсібилігіне байланысты. Колледж қабырғасында алған сапалы білім мен саналы тәрбие – түлектеріміздің сенімді болашағының бастауы», деді ол.
Атаулы күнге орай генерал-майор Шайх-Хасан Жазықбаев әскери колледж бастығы полковник Ғазиз Төлеушевке Қорғаныс министрінің атынан Алғысхат табыс етті.
Колледж ұжымы мен оның түлектерін 25 жылдығымен Қарулы күштердің ардагерлері отставкадағы генерал-майор Әлихан Жарболов пен отставкадағы генерал-лейтенант Абай Тасболатов та құттықтады. Өз кезегінде «Қарулы күштердің ардагерлері» РҚБ төрағасының орынбасары, отставкадағы генерал-майор Марат Нағұманов колледж оқытушылары майор Бақберген Серікбаев пен Күнсай Нұрғалиеваға «Сағадат Нұрмағамбетовке 100 жыл» медалін табыс етті.
Әскери оқу орнының алғашқы түлектерінің бірі, Әскери-әуе күштері қолбасшысы басқармасының аға офицері, подполковник Алмат Ақыш «Жас ұлан» республикалық мектебіне 1999 жылы түскенін жеткізді.
«Мұнда өткізген жылдарды әрдайым ерекше сағынышпен еске аламын. Бірінші кезекте тәртіпке үйрендік. Отан алдындағы борышқа берік болу және патриоттық дегеннің не екенін білдік. Менің түсінігімдегі патриотизм – тек жарғы, марш және сапта тұру ғана емес, бұл өз еліңнің алдындағы жауапкершілік сезімі, өз үйіңді қорғауға дайын болу. Әскери білім маған үлкен өмірге жолдама берді. Бұл үшін мен педагогтер ұжымына алғысымды білдіремін», деді А.Ақыш.
Айта кетсек, колледжді бітірген түлектер бірден әскери қызметке жіберіледі. Арасында оқуды жалғастыруға шешім қабылдағандар да бар. Биыл колледжді 82 курсант бітірді.
Іс-шара Ұлттық әскери-патриоттық орталығының шығармашылық ұжымы дайындаған мерекелік концертпен аяқталды. Естеріңізге сала кетсек, армия генералы Сағадат Нұрмағамбетов атындағы әскери колледж 2021 жылы Астанада «Жас ұлан» республикалық мектебінің базасында құрылған. Оған біртуар тұлға Сағадат Нұрмағамбетовтің есімі 1999 жылы берілген.