Қара өлеңнің қаймағын қалқып, қоржынын тоғайтқан ақын, аудармашы, «Дарын» мемлекеттік жастар сыйлығының лауреаты Ақсұңқар Ақынбабаның Қазақстан Жазушылар одағының 90 жылдығы қарсаңында Мәдениет және ақпарат министрлігінің қолдауымен «Алтай – Алатау арасы» атты авторлық ән-жыр шығармашылық кеші өтті. Автордың «Мен – Алтайдан ұшқан Ақсұңқар», «Жанартау» жыр жинақтары, «Жарылыс» атты аударма кітабы жарық көрген. Алматының төріндегі кешке Қазақстан Жазушылар одағы мен Дүниежүзі қазақтары қауымдастығы қолдау көрсетті.
Құрманғазы атындағы Ұлттық халық аспаптар оркестрінің концерт залында өткен кеш шымылдығын әйгілі Құрманғазы атындағы оркестр ашты. Рухты жыр мен жүрек тербер әндерді арқау еткен кештің ашылуында ақынға Мәдениет және ақпарат вице-министрі Қанат Ысқақовтың, Қазақстан Жазушылар одағы басқармасының төрағасы Мереке Құлкеновтің құттықтау хаттары табыс етілді. Онда Ақсұңқар Ақынбабаның қазақ руханиятына қосқан қуатты жырлары оқырман жүрегінен орын алып қана қоймай, жас ұрпақты рухани байлыққа жетелейтіні жазылған. Қасиетті атажұртқа келгеннен бері елге деген махаббаты, ұлтқа деген құрметі өлеңдерінің негізгі мазмұнына айналғаны аталды.
Ақын шығармашылық кешін «Рух мәңгі!» деген өлеңімен, сазгер Бейбіт Оралұлы әнін жазған өзінің орындауындағы «Мен оралдым» әнімен бастады.
«Ақсұңқар Ақынбаба – әдебиетке 90-жылдардың басында келген буын өкілі. Ақын қыздардың арасында өлеңдерінде де, мінезінде де асқақ рух андағайлап тұратын бір ақын болса, ол – Ақсұңқар Ақынбаба. Ақсұңқарды біз 2000 жылдың басында әнші ретінде мойындадық. Кәсіби әншіден кем түспейді. Бұл – екінші қыры. Ал үшінші қырына келсек, журналистикадағы атқарған шаруасы аз емес. Ол газетте, сондай-ақ Қазақ радиосында өнімді жұмыс істеді. Бірталай бағдарламаның авторы атанды. Мысалы, кезінде «Ұйқым келмейді» деген бағдарламасын қалың жұртшылық ұйып тыңдайтын. Ақсұңқардың бергенінен берері алда деген үміттеміз» дейді ақын, «Үркер» журналының бас редакторы Жарас Сәрсек.
Өнер көгінде жұлдызы жарық қарындасына қолдау білдіре келген ағасы Шашу Үсенұлы Ақсұңқар Моңғолияның Баянөлгей аймағында орта мектепті бітіріп, атажұртта жоғары білім алған талант иесі екендігін, ата-анасы да ұстаздық еткен, өте білімді, дарынды адамдар болғанын айрықша атады. «Тәуелсіздік кезеңіндегі қазақ поэзиясына еңбек етіп жүргеніме ширек ғасырдан асады екен. Ал атажұртыма келгеніме 30 жыл толыпты. Мектеп бітірген жылы келгенмін. Содан бергі уақытта әдебиетке, өнерге қосқан үлесімді, шығармашылықтағы жауһарларымды жинақтай келе, «Алтай – Алатау арасы» деген жеке ән-жыр шығармашылық кешімді өткізуді жөн көрдім. Ән-жыр кешім деуімнің себебі, өлеңім мен әнімді қатар алып келе жатпасам да, бойыма ақындық пен әншілік қатар қонған өнер. Сол себепті, домбырам мен қаламым – қос қанатым іспетті», дейді көптеген жыр мүшәйраның жүлдегері Ақсұңқар Ақынбаба.
Шығармашылық кеш аты айтып тұрғандай, ақынның отыз жылда жинақталған шығармашылығы, яғни поэзия мен ән әлемін шебер үйлестірген, жырларымен де, әуелете салған тамаша әндерімен де көрермен көңілін рухани серпілтіп, байыта түскені анық.
Кеште ақын поэзиясынан қойылған «Азаттық рухы», «Алтай жыры», «Романс» қатарлы поэтикалық қойылымдар көрсетіліп, танымал жас әншілердің орындауында «Мәңгілік ел» (әні Б.Оралұлы), «Түркістаным-Тұраным» (әні А.Сәндібайұлы) әндерінің тұсауы кесілді.