Батыс Қазақстан облысының Қазталов ауданында 16 ауылдық округ, үлкенді-кішілі 47 елді мекен бар. Биыл осы ауылдардың басым көпшілігінде құрылыс қызу жүріп жатыр.
Бұл – халықтың әл-ауқатын жақсарту мақсатында елімізде жүзеге асып жатқан бірқатар мемлекеттік бағдарламаның нәтижесі. Ауылдағы ағайын да осындай тұрғын үй бағдарламаларының игілігін көріп отыр. Мәселен, тек Қазталов ауданында ғана биылдың өзінде 55 отбасы жаңа баспанаға кіріп, қоныстойын тойлады.
Мемлекет басшысы Қасым-Жомарт Тоқаев Атырауда өткен Ұлттық құрылтайда: «Баспана – жұрттың тұрмыс сапасын танытатын тағы бір маңызды көрсеткіш. Биыл 1 наурыздан бастап іске қосылған «Отау» ипотекалық бағдарламасы ел ішінде үлкен сұранысқа ие болып отыр. Бұған қоса, ауыл және аудан орталығының тұрғындарына арналған жаңа тұрғын үй бағдарламасын қолға алу керек. Бұл ретте әлеуметтік тұрғыда осал топтағы жандарға несие өсімі 7 пайыздан аспауы қажет. Сонымен қатар сатып алу құқығымен жалға берілетін баспана санын бірнеше есе көбейтуді Үкіметке тапсырамын», деген еді.
Міне, Президенттің осы тапсырмасына сәйкес Өнеркәсіп және құрылыс министрі 2023 жылғы 22 желтоқсанда «Республикалық бюджет есебінен тұрғын үй салуды, сатып алуды қаржыландыру немесе мемлекеттік бағалы қағаздар шығару, тұрғын үйге мұқтаж Қазақстан Республикасының азаматтарына тұрғын үйді мониторингілеу және өткізу қағидалары» туралы бұйрық шығарған. Дәл осы қағидаға сәйкес биыл Қазталов ауданында халықтың әлеуметтік осал топтарын тұрғын үймен қамту мақсатында 142 тұрғын үйдің құрылысы басталған еді. Бұл тұрғын үйлерді сатып алуға республикалық, облыстық бюджет есебінен қаражат бөлінді.
– Қазіргі таңда ауданда салынып жатқан 1 пәтердің құны – 15,5 млн теңге. Ауылдағы екі пәтерлі тұрғын үй 31,0 млн теңгеге шығады. Біздің Қазталов ауданында тұрғын үй салуға 46 жеке инвестор тартылған. Қазір 28 елді мекенде құрылыс жұмысы жүріп жатыр. Құрылыс сапасын бақылау мақсатында барлық ауылдық округте өндірістік жұмыс кестесі бекітілген. Жергілікті қоғам өкілдері арнайы жұмыс тобын құрып, құрылыс барысын қадағалап отыр. Жаңа үйлер қазіргі заман талабына сай. Жұмысты негізінен жергілікті инвесторлар мен мамандар атқарып жатыр. Жалпы, жоспар бойынша ауданда 28 елді мекенде 76 тұрғын үй, 142 пәтер салуымыз керек, дейді аудан әкімі Асланбек Сарқұлов.
Ауылда, шалғай елді мекендерде жаңа тұрғын үйлердің салынуы – мемлекеттің ауылға көңіл бөліп отырғанының айқын көрінісі. Баспаналы болған ауылдықтардың қуанышында шек жоқ.
– Жаңа үйлер ауылдың тынысын аша түскендей. Бір жағынан ауыл жаңарып, ажары кіреді, екінші жағынан ауылымыз өседі, кеңейеді. Аудан әкімдері халықпен кездескенде жиі айтылатын мәселенің бірі осы – баспана. Соңғы кездері бұл да шешімін тауып, халықтың қуанышы еселеніп отыр. Қазір мемлекеттік бағдарлама арқылы салынған үйлер ауылдағы ағайынға дем беріп, жеке тұрғын үйлердің де келбеті келіскен жайы бар, деді Қазталов ауылының тұрғыны Марат Тоясов.
Ал Жаңатаң елді мекеніндегі көпбалалы Сисеновтер әулеті баспана кілтін облыс әкімі Нариман Төреғалиұлының өз қолынан алды.
– Қазір шекаралық аймақтарға, ауылдар мен елді мекендерге ерекше назар аударылып, бірқатар жоба жүзеге асып жатыр. Соның бірі – «Қаладан – ауылға» өңірлік бағдарламасы. Осы бағдарлама арқылы Қазталов ауданының Жаңатаң елді мекеніне көшіп келген алғашқы отбасымыз. Бізге келген бойда уақытша тұрғын үй берілді. Қорамызға мал кірді. Қазір сол төрт түліктің игілігін көріп отырмыз. Тұрақты жұмысқа да орналастық. Өзегінен теппей, құшақ жая қарсы алған ауыл халқына алғысымыз шексіз. Осы орайда облыс, аудан басшылығына халықтың әл-ауқатын арттыру мақсатында игі жобаны жүзеге асырып, көрсеткен қолдауына разылығымызды білдіремін, дейді Аят Сисенов.
Жақында Мәжілісте 2025–2027 жылдарға арналған үш жылдық бюджет талқыланғаны, соның ішінде Батыс Қазақстан облысының инженерлік, көлік және әлеуметтік инфрақұрылымын дамытуға қосымша 1,978 млрд теңге қаражат бөлінгені хабарланған еді. Міне, осы қаржының басым бөлігі де Қазталов ауданындағы Болашақ, Қазталов, Қараоба, Қошанкөл ауылдарының ішкі жолдарын жаңғыртуға жұмсалғалы отыр.
«Астанаға арнайы келіп, өз ауданына қатысты жобалардың қажеттілігін дәлелдеп, осындай қаржының бөлінуіне ықпал еткен Қазталов, Жәнібек, Бөкейордасы аудандарының әкімдерінің белсенділігін атап өтер едім. Өйткені бюджетті қорғау барысында атқарушы орган өкілдерінің депутаттармен бірге болуы өте маңызды», дейді Мәжіліс депутаты Абзал Құспан.
Осы жаңалықты естігелі алдағы жылдары да Қазталов ауданының елді мекендері жаңғырып, жайнай түсетініне сеніп отырмыз.
Батыс Қазақстан облысы