Балабақшадағы тәрбиеші ағай

Алғашында ата-аналар ер адам­ның балабақшада тәр­биеші болып жүргенін қабылдай алмапты. Бірақ уақыт өте келе оның тобына ұл-қызын бергісі келетін ата-аналар көбейген.

«Балаларды тәрбиелеу оңай емес. Сол үшін барлық ісіңде өзіңе есеп бере алатындай мұқият болуың керек. Өйткені олардың әрқайсысына жауап бересің, көзіңнен таса қалдыруға болмайды. Үнемі қадағалап отыру керек. Бірақ өз ісіңді ұнатсаң, оның қиыншылығы да қызық болып көрінеді емес пе?

Топтағы балаларды дәретханаға апару, қыздарды киіндіру жұмыстарын көмекшім Жанар Қабылқызына тапсырамын. Жалпы, мен бұл жұмысқа келгеніме еш өкінбеймін. Балалармен жұмыс істегеннен жұрт ойлағандай жүй­кем жұқармайды, керісінше олардың шынайылығынан шабыт аламын. Жас ұрпақты тәрбиелеп, қоғамды жақсы­лық­қа бағыттағым келеді. Көпшіліктің ер тәрбиешілерге тіксіне қарайтыны бел­гілі. Бірақ бұл қызметті тек әйелдер­дің мамандығы деген пікірді жоқ­қа шы­ғарғым келеді», дейді ол.

Жүрек қалауын тауып, жұмысын «ма­мандықтың төресі» деп бағалайтын Арман ағай еңбек жолын Бурабай ауда­нының Ұрымқай аулында бастауыш сынып мұғалімі қызметінен бастаған. Ал тәрбиешілік қызметке келуі кездейсоқ болыпты.

«Мектепте жүргенде-ақ мұғалім болсам деп армандайтынмын. Бірақ балабақшада тәрбиеші боламын деп еш ойлаған жоқпын. Оқуға құжат тапсырар сәтте бастауыш сынып мұғалімі мамандығын таңдадым. Осылайша, 2001 жылы Щучинск қаласындағы Педа­гогикалық колледжінің бастауыш сынып мұғалімі мамандығын тәмамдадым. Қызығы сол, «Арман» мектептен тыс оқы­ту-тәрбиелеу орталығында қызмет етіп жүр­генмін. Ол жақта 4-5 жастағы балалар­ға ар­налған орыстілді студия бар еді. Бір күні мұ­ғалімдері келмей қалып, мені сол балалар­мен жұмыс істей тұруға жіберді. Мен бар ықыласыммен сабақ беріп шықтым. Сол кезде әріптестерім балақайлармен жақсы тіл табысатынымды аңғарып, оң бағасын берді. Осылайша, орталықтың директоры Айгүл Айтжанқызы студияны қа­зақ тілінде де ашсақ деген ұсынысын айт­ты. Мен бірден келістім. «Болашақ» де­­ген атын да өзім ұсындым. Содан бері осы ор­талықтың тәрбиешісімін», дейді ол.

Айта кетейік, Арман Кәрібайұлы – Ақмола облысындағы мектепке дейінгі мекемелерде тәрбиеші болып жұмыс істейтін жалғыз ер-азамат. Ол көптеген байқауда жүлделі орын иеленіп, өзінің білікті маман екенін сан мәрте дәлелдеген. «Тәрбиеші ағай» сабақты көбіне-көп ойын түрінде өткізеді екен. Бастапқыда орысша шүлдірлеп келген балалар осы жерде қазақшаны үйреніп, қазақ мектептеріне барып жатқан көрінеді.

Балалар-жасөспірімдер шығарма­шы­лық орталығы директорының міндетін ат­қарушы Ләззат Егембердиеваның айтуынша, бала тәрбиесінде ер адамның рөлі зор.

«Тәрбиеші – қиын да қы­зықты ма­ман­дықтың бірі. Оған әркімнің жүрегі дауаламайды. Қазір ер адамдар­дың көбі жұмысбасты. Сондықтан да бала тәрбиесімен аналар көбірек айналысады. Мектепте де оқушыларға сабақ бе­ріп жүрген мұғалімдердің басым көп­шілігі – әйелдер. Бұл – баланың мі­нез-құлқына кері әсер етеді, қыз мінез­ді жігіттердің көбеюі соның салдары. Қазақтың тұрмыс-салтында бала тәр­бие­сімен аналар айналысқанымен, ер-аза­маттың қас-қабағы, мысы, бірауыз сөзі көп нәрсені шешеді. Ал енді осы сала­ға өзінің құлшынысымен келген Арман Кәрібайұлының еңбегі мақтауға тұрарлық. Балаларды ұйымдастыруы, құндылыққа негізделген сабақ өткізу әдісі бізді ерекше тәнті етті», дейді Л.Егембердиева.