АСТАНА. 17 маусым. Астананың полиция қызметкерлері «Астаналық» базары маңындағы бұзақылыққа қатыстылығын тексеру мақсатында 18 адамды ұстады. Аталған базар халық арасында «Артем» сауда үйі деген атпен белгілі. Бұл туралы қалалық ішкі істер департаментінің баспасөз қызметі хабарлады.
Кеше, сағат 20:10 шамасында департаменттің жедел басқару орталығына сауда үйінің қауіпсіздік қызметкерлері қайыршы әйелді ұстағаны туралы хабар келіп түскен. Тәртіп сақшылары 30 жастағы әйелдің ІІ топтағы мүгедек және мектеп жасына дейінгі үш баласымен қайыр сұрау мақсатымен Алматыдан Астанаға арнайы келгенін анықтады. Ол бұған дейін де осындай құқық бұзушылығы үшін әкімшілік жауапкершілікке тартылған.
Айта кетейік, кеше кешкісін қайыр сұраған азаматша Б. мен сауда үйінің қауіпсіздік қызметкерлері сөзге келіп, соңы жанжалға ұласады. Олардың жанына сол жердегі адамдар жиналып, көбейе түскен. Осы оқиғаға байланысты 18 адам қолға түсті. Олардың арасында мас адамдардың да бар екені белгілі болып отыр. Зардап шеккендер мен мүлікке зақым келу деректері анықталған жоқ.
Бүгінде бұл факт сотқа дейінгі тергеудің бірыңғай тізіліміне тіркелді. Азаматша Б.-ның арызымен Қазақстан Республикасы Қылмыстық кодексінің 252-бабы бойынша (жеке күзет қызметтері қызметшілерінің өз өкілеттіктерін асыра пайдалануы) сотқа дейінгі өндіріс басталды. Сондай-ақ, сауда үйі қауіпсіздік қызметкерлерінің арызымен Қылмыстық кодекстің 293-бабы бойынша (бұзақылық) материал тіркелді. Қазір осы іске қатысты тергеу амалдары жүргізілуде.
Еламан Қоңыр.
Дерек: Астана қалалық ішкі істер департаментінің баспасөз қызметі.
Сурет: today.kz.