Қызылжардың дамуы қарқынды

Биыл су тасқыны Пе­тро­павлдың 2 485 үйін бас­ты, ал 1 873-і апатты деп танылды. Тасқын зардаптарын жою мақсатында бірқатар игі іс-шаралар атқарылды. 1 174 пәтер «Qyzyljar asar» қорының көмегімен сатып алынды. Үкі­меттің ұйымдастыруымен 700 тұрғын үй жаңа жерге салынып, ол «Бірлік» шағын ауданы деп аталды. Құрылыс жұмыстарын «Қазақстан халқына» қоры, «Кас­пи.кз», «ҚазМинералс ме­недж­мент» компаниялары мен «Қазақмыс» корпорациясы қар­жыландырды. 7 455 адамға бар­лығы 2,7 млрд көлемінде бірреттік 100 АЕК көмек, жапа шеккен 2 092 адамға 150 АЕК көлемінде 1 млрд 16 млн 134 мың теңге көле­мінде жәрдемақы берілді.

Өткен тамыз айынан бастап су шайып кеткен Ущев көшесі мен Тері зауыты аралығындағы, Биопруд аумағындағы 2 дамбаны қалпына келтіру жұмысы қолға алынған. Сонымен бірге 2 нүктедегі үйіндіні 7 метрге дейін өсіру үшін 1 млн тонна инертті материалдар үйілді.

Петропавл еліміздің өнер­кәсіпті қалаларының бірі саналады. 2024 жылдың он айында өнеркәсіп өндірісінің көлемі 373,8 млрд теңгені құрады. 2023 жылмен салыстырғанда өсім 7,0% болды. Негізгі капиталға салын­ған инвестициялар көлемі – 150,4 млрд теңге, өсімі 14,1%-ды құ­рады. Биылғы 10 айда қалада 100,1 мың шаршы метр тұрғын үй пай­далануға берілді. Былтырғы жылмен салыстырғанда өсім – 31,4%. Осы уақыттағы бөл­шек сауда көлемі 224,0 млрд тең­гені құрады. 2023 жылмен салыстырғанда өсім – 7,8 %.

Құрылыс жұмысының көлемі 55,7 млрд теңгені құра­ды. Жас Өркен, Копай, Береке, Орталық, Орман шағын ауданда­рындағы 32 құрылыс алаңында 251,5 мың шаршы метр тұрғын үй құрылысы жүргізілді. Соның 100,1 мың шаршы метрі 10 айда пайдалануға берілді.

Петропавл қаласы көшеле­рінің жалпы ұзындығы 366 шақырым, соның 182 шақырымы әлі күнге асфальтталмаған. «Ал­дағы 5 жылда соның бәрін асфальттауды жоспарлап отырмыз. Бұл тұрғындардың өмір са­пасын арттырады. Биыл 32 көшенің 28 шақырымдық жолын асфальттадық. Облыс басшы­лығы бастамамызды қолдап, тиіс­ті қаражат бөлгізді», дейді Пе­тро­павл қаласының әкімі Серік Мұхамедиев.

Өткен жылғы қалың қар Есілдің тасуын туғызып қана қоймай, күрт еріп, қаланың орта­лық даңғылдарының бірі Абай көшесіндегі кәріздік суағарларды да бітеп тастады. Соның кесірінен тұрғын үйлердің жертөлелерін су алып қалды. Қала әкімдігі 2024 жылдың 4 сәуірінен табиғи сипат­тағы төтенше жағдай жариялап, 2075 метр кәріздік коллекторға жөндеу жүргізілді. Бүгінгі таңда «Қызылжар су» ЖШС қалалық кол­лекторлардың қалыпты жұ­мыс істеуін өз бақылауына алған.

Биылғы тасқында қалаға су көтеретін сорғылардың баған­дарын алып сеңдер қиратып, істен шығарды. Қала сусыз қалу қаупін бастан кешірді. Әйтеуір баламалы көздерден су алуға қа­ланың барлық құрылыс компания­лары тартылып, тұрғындарға бір тәуліктің ішінде су жеткізілді. Қазір Үкіметтің көмегімен су стансасының жөндеу жұмыстары аяқталып келеді.

Былтыр Жуков көшесіндегі кәріздік коллектор бітеліп қа­лып, арнаулы экономикалық аймақты су басып, біраз әбігер етті. Диаметрі 500 мм болатын кәріздік құбыр орнатылып, апат уақытында еңсерілді.

Қаланың жылу тарату жүйесіндегі құбырлары биыл 7,5 ша­қырымға күрделі және ағым­дық жөндеулерден өткізілді. Жаңа шағын аудандарға да жылу жеткізетін жүйелер тартылды. Жылыту маусымы 30 қыр­күйектен басталды, қаладағы 1 170 көпқабатты тұрғын үйлерге тегіс жылу берілді. Әзірге жылыту маусымы қалыпты жағдайда өтіп жатыр.

Бұл деректерді Петропавл қаласының әкімі Серік Мұха­медиев журналистерге берген брифинг барысында мәлім етті. «Қаланы қардан тазалуға 90 бірлік техника дайындық сапына қойылған. Сонымен бірге көктайғаққа себілетін 3,2 мың текше метр құмды-тұзды қоспа да дайын. Тұрғындар тарапынан қардың уақтылы тазаланбайтыны жөнінде арыз-шағым баршылық. Біз оны оңтайлы шешу жолдарын қарастырып жатырмыз», деді әкім.

Сонымен бірге әкім келесі жылы Қазақ­стан Конституциясы көшесін жаңғыртуды жоспарлап отыр­ғандарын айтты. Жаңа аялдамалар туралы да өз ойын білдірді. Петропавл қаласына биыл 18 жылы аялдама салу көзделген. Алайда олардың әрқайсысының құны 8,5 млн теңге екен. Пе­тропавлда бір бөлмелі жайлы пәтердің құны сондай. Осы орайда тұрғындар оның қымбат екеніне наразы.

ПЕТРОПАВЛ