Бәйгеде бағы жанғандар

Жиында аймақ басшысы Марат Сұл­танғазиев елімізде ұлттық спорт түрлері қарқынды дамып келе жатқанын атап өтті. «Президент Қасым-Жомарт Тоқаев ұлттық спорт түрлерін белсенді дамыту қажеттігін үнемі айтып келеді. Өңірде бұл бағыттағы жұмыстар жоғары деңгейде жүргізіліп жатыр. Айталық, биылдың өзінде облысымызда бірнеше ірі рес­публикалық бәйге жарыс өтті. Соның ішінде «Қымызмұрындық – 2024» фестивалі аясында Кеген ауданында ұйымдастырылған «Жолан жүйрігі», Райымбек ауданында Бердібек Соқпақбаевтың 100 жылдығына арналған рес­пуб­ликалық старт, Жамбыл облы­сындағы 100 шақырымдық ма­рафон-бәйгелерінің бәсі ерекше болды. Биылғы ең айтулы оқиғаларының бірі – V Дүниежүзілік көшпелілер ойын­дары. Онда еліміздің құрама ко­мандасының сапында Алматы облысының 9 спортшысы өнер көрсетіп, 2 алтын, 1 күміс, 1 қола медальді иеленді. Бұл – үлкен жетістік. Атқа міну – ата-бабамыздан қалған өнер. Бір қуанарлығы, қазіргі таңда жастарымыздың арасында жылқы өсірумен, баптаумен айналысатындар қатары көбейіп келеді», деді облыс әкімі Марат Елеусізұлы.

Салтанатты жиында 10 спортшы мен жаттықтырушы Алматы облысы әкімінің Құрмет грамотасымен марапатталды. Олардың қатарында Астана қаласында өткен V Дүниежүзілік көшпелілер ойындарының жеңімпаздары, Алматы облысының жас шабандоздары Аңсар Арыстанбек пен Сержан Бақтыбай бар.

«Ат спортымен айналыс­қаныма 9 жыл болды. Мәре сы­зығынан бірінші болып өту ша­бандозға байланысты, ол тақы­мындағы тұлпардың жай-күйін сезінуі керек. Үлкен бәйгелерде жеңіске жету – жаттыққан тұл­пар мен білікті шабандоздың ортақ еңбегі», дейді ат спорты шеберлігіне кандидат Аңсар Арыстанбек.

17 жастағы Алдияр Уайсхан да ерекше құрметке ие болды. Қарасай ауданында Д.Қонаевты еске алуға арналған дүбірлі бәй­­­геге қатысушылардың бірі ер­тоқымға ілініп қалғанда Алдияр жедел қимылдап, қатердің алдын алып, ерлік көрсеткен.

Іс-шара барысында ат құла­ғында ойнаған бірқатар спортшы об­лыстық дене шынықтыру және спорт басқармасының Алғыс хатымен марапатталды. Олардың арасында спорт ардагерлері, үздік жаттықтырушылар мен спортшылар, білім, спорт ұйымдарының белсенді қызметкерлері бар. Сал­танатты бөлімнен кейін шағын мерекелік концерт ұйымдас­тырылды.

Алматы облысы