Атырау облысының ішкі істер саласында жұмыс істейтін қыз-келіншектер аз емес. Олардың арасында қызметімен бірге спортта да жетістікке жеткен арулар бар. Соның бірі – Аида Хайруллина.
Қоғамдық тәртіптің сақталуына үлес қосып жүрген ару спорттың бірнеше түрімен айналысады. Биыл қыркүйекте қоян-қолтық ұрыстан Бішкекте өткен Азия чемпионатында қарсыластарының бәрін қапы қалдырып, бірінші жүлдені олжалады. Әлем кубогін екі рет иеленген.
Өткен аптада Индонезияның астанасы – Джакартада ересектер арасындағы «Gamma World MMA Championship – 2024» әлем чемпионатында бақ сынады. Дүбірлі додаға әлемнің 66 елінен 920 спортшы қатысты. Кіл мықтылардың сайысында атыраулық полицей 72,6 кг салмақта ел намысын қорғады. Алдымен Камбоджа, Аустралия елінің спортшыларымен күш сынасып, шеберлігі мен физикалық дайындығының жоғары екенін дәлелдеді. Финалда Мысыр елінің спортшысын айқын басымдықпен ұтты.
«Біздің қызмет жауапкершілікті, табандылықты талап етеді. Міндетімізді адал атқарумен бірге спорттық шеберлігімізді шыңдауға да уақыт табамыз. Жұмыста, спортта жетістікке жетуіме әріптестерім мен жаттықтырушыларым, отбасым қолдау көрсетті. Алдағы уақытта да еліміздің абыройын асқақтатуға күш-жігерімді сала беремін», дейді А.Хайруллина.
Атырау облысы