Биыл «Amanat» партиясының «Жастар рухы» жастар қанатының бастамасымен өңірде екі ірі бос жұмыс орындар жәрмеңкесі ұйымдастырылды. Нәтижесінде, «Жастарға жұмыс» жобасы аясында жүзден аса жас маман жұмысқа орналасты.
«Жастарға жұмыс» жобасының мақсаты – жұмыс іздеген жастарды жергілікті кәсіпорындармен байланыстыру және өңірдегі жұмыссыздық деңгейін төмендету. Аталған жәрмеңкеге 97 кәсіпорын қатысып, 700-ге жуық бос жұмыс орны ұсынылған.
«Қазіргі таңда Алматы облысында 280 мыңға жуық жас бар. Олардың 6 мыңға жуығы жұмыссыз ретінде тіркелген. Осындай жәрмеңкелер арқылы біз жастарды еңбек нарығына бейімдеп, өз салалары бойынша жұмыс табуына мүмкіндік жасап отырмыз. Бұл шара тек бос жұмыс орындарын ұсынумен шектелмейді. Сонымен қатар жастарға еңбек нарығындағы талаптар туралы ақпарат беріп, кәсіби дағдысын дамытуға көмектеседі. Осындай шаралардың нәтижесінде 109 жас маман жұмысқа орналасты, ал 200-ге жуық жас сұхбаттасуға шақырылып, өзін көрсету мүмкіндігін алды», дейді «Жастар рухы» жастар қанатының Алматы облыстық филиалы төрағасы Медет Бекбергенов.
Кәсіпорындар ішінде ерекше көзге түскендердің бірі – Талғар ауданындағы «Keruen Plus» зауыты. Су және жылыту жүйелеріне арналған пластикалық құбырлар мен фитингтер шығаратын бұл өндіріс орны «Wuko deniz» брендімен кең танылған. Зауыттың жоғары өндірістік әлеуеті мен сапалы өнімдері ішкі нарықта үлкен сұранысқа ие. Осы жәрмеңке барысында кәсіпорын 50-ден аса бос жұмыс орнын ұсынып, жұмыс іздеушілердің үлкен қызығушылығын тудырды.
Жұмыс тапқандардың бірі – 29 жастағы Дәурен Сәбитов. Ол жәрмеңкеге қатысқаннан кейін «Keruen Plus» зауытының өндірістік бөліміне жұмысқа орналасты. Бұрын жұмыссыз болған ол бұл зауыттың жалақысы, жұмыс жағдайы және мамандарды кәсіби дамытуға бағытталған мүмкіндіктеріне ризашылығын білдірді.
«Мен зауыт өкілдерімен партия ұйымдастырған жәрмеңкеде таныстым. Олар өздерінің өндіріс үдерістері, ұсынатын мүмкіндіктері туралы жан-жақты ақпарат берді. Қазір өндіріс орнында техникалық маман ретінде қызмет атқарып жүрмін. Жұмысым ұнайды әрі осында өсу мүмкіндіктері бар екенін сезінемін», дейді Дәурен.
Айта кету керек, «Amanat» партиясы Алматы облыстық филиалы мен «Жастар рухы» жастар қанаты жұмысқа орналастыру мақсатында мемлекеттік қолдау шараларын кеңейтіп, NEET санатындағы жастарды оқыту және жұмыспен қамту үшін арнайы семинарлар ұйымдастырып келеді. Сондай-ақ жыл сайын 350 жеңілдетілген кредит беру және кәсіпорындарда 5 мың жас үшін ашық есік күндерін өткізу жоспарланған. Бұл шаралар жастар жұмыссыздығын 3,5%-дан 2,9%-ға дейін төмендетуге мүмкіндік бергені туралы партияның Алматы облыстық филиалының баспасөз қызметі хабардар етті.
Алматы облысы