Президент Қасым-Жомарт Тоқаев «Ана тілі» газетіне берген сұхбатында «Заң мен тәртіп» қағидасы туралы тоқталып өтті, деп хабарлайды Egemen.kz.
Президент бұл қағиданың мән-маңызы әлдеқайда терең екенін жеткізді. Яғни «Заң мен тәртіп» қағидасы құқық қорғау саласына ғана арналған деп тұжырымдаған дұрыс болмайды.
«Мен бұл қағиданы тереңірек түсінемін. «Заң мен тәртіп» – мемлекеттік құрылыстың басты қағидаты. Бұл ретте жазалау шараларын қолдану арқылы қоғамға жаппай бақылау орнату туралы айтып отырған жоқпыз. «Заң мен тәртіп» қағидаты – шын мәнінде кемел демократияның тірегі, құқықтық мемлекеттің негізі. «Заң мен тәртіпке» бағынбасақ, құқық нормаларына құрметпен қарамасақ, Әділетті Қазақстанды құрып, оны өркендеген мемлекет ете алмаймыз.
Сондықтан біздің міндетіміз – бұл қағидатты еліміздің құндылықтар жүйесіне барынша кіріктіріп, халық болмысының, қоғам өмірінің ажырамас бөлігіне айналдыру», деді Президент.
Қасым-Жомарт Тоқаев «Заң мен тәртіпті» берік орнықтыру үшін көп уақыт пен күш-жігер қажет екенін айтты.
«Бәрі бірдей бұл қағидатты қатаң ұстануға, оны өмір салтына айналдыруға әлі дайын емес. Бірақ талаптанған адам қалайда мұратына жетеді», деді Мемлекет басшысы.