Ұлттық ұланның «Батыс» өңірлік қолбасшылығына қарасты әскери бөлімдерде 2025 жылдың қысқы оқу кезеңі басталды, деп хабарлайды Egemen.kz қолбасшылықтың баспасөз қызметіне сілтеме жасап.
Қаңтардың 5-і күні өңірлік қолбасшылыққа қарасты барлық әскери бөлімнің саптық алаңында дәстүрлі митинг өткізіліп, жауынгерлік қызмет барысындағы қауіпсіздік ережелерін сақтау бойынша практикалық сабақ жүргізілген.
Жаңа оқу кезеңінің ашылуына Ұлттық ұлан Бас қолбасшысының орынбасары генерал-майор Бауыржан Абжанов қатысып, жеке құрамды жаңа оқу кезеңімен құттықтады. Өз сөзінде ол оқу кезеңінің маңыздылығына тоқталып, ұландықтардың жауынгерлік дайындығын арттыру, кәсіби шеберлігін шыңдау және жаңа технологияны, нақтырақ айтсақ ұшқышсыз ұшу аппараттарын пайдалану мәселесіне тоқталды.
Оқудың алғашқы күні ұландықтар мемлекеттік-құқықтық және жауынгерлік дайындық, қару-жарақ пен әскери техниканы қолдану және оны кешенді күту, сондай-ақ, алғашқы медициналық көмек көрсету, ату және дене шынықтыру дайындығы және парктік-шаруашылық жұмыстарды жүргізу кезінде қауіпсіздік шараларын сақтау бойынша сабақтар өткізілді.
Жаңа оқу кезеңі мамыр айына дейін жалғасады.
Батыс Қазақстан облысы