Цехтан 8 млн теңгенің алкоголь өнімі табылды, деп хабарлайды Egemen.kz.
Полиция қызметкерлері мен Экономикалық тергеу департаментінің өкілдері аудандық прокуратураның үйлестіруімен Қарабалықта заңсыз алкоголь өндірісін анықтау бойынша бірлескен іс-шара жүргізді.
«Құқық қорғау органдарының назары облысқа шыны ыдыстардың үлкен партиясын әкелген жүк тасымалдау қызметін көрсететін кәсіпкерге аударылды. Жүргізілген жедел іс-шаралар нәтижесінде облыс орталығындағы ықшамаудандардың бірінің аумағында контрафактілік өнімдері бар цех анықталды. Тінту кезінде алкоголь өнімдерін өндіруге және бөтелкеге құюға арналған жабдықтар, сондай-ақ 0,5 литрлік 2 180 бөтелке алкоголь тәркіленді», делінген хабарламада.
Сонымен қатар заңсыз өнімді жөнелту пункті анықталып, жойылды. Осы орынға жеткізілген Газель көлігінде 3 мың бөтелке алкоголь мен спирттік өнім болуы мүмкін 5 литрлік сұйықтығы бар 16 канистр табылды.Жедел іздестіру шараларының нәтижесінде 36 жастағы жергілікті тұрғын ұсталды. Бұл оқиға бойынша сотқа дейінгі тергеу басталды.