АСТАНА. 14 ақпан. Ақтөбеде 7 ақпан күні Ислам Қазбеков есімді 10 жасар бала жоғалып кетіп еді. Ол арада 9 сағат өткеннен кейін аман-есен табылды. Бұл туралы жергілікті «Диапазон» газеті хабарлады.
Осы оқиға туралы біз де хабарлаған едік. Кейін анықталғандай, бала үйдің ауласындағы, 11-шағын аудандағы №32 мектептің жанындағы мұз айдынында ойнап қайтуға әжесінен рұқсат сұрап кетеді.
Сағат 16:00-де үйден кеткен Ислам сол бойы хабарсыз қалады. Арада бір сағат өткенде, үй жанында сырғанақтан немересін таппаған әжесі оны полицейлермен бірге іздеуге шығады.
Іздеушілер Исламды тек сағат 00:20-да «Мега-Ақтөбе» сауда орталығының жанындағы мұз айдынынан табады. Оны қалалық ішкі істер басқармасы бастығының орынбасары Нәби Алдамжаров байқап қалады. Оны кішкентай баланың түннің жарымында бір өзі жүргені күдіктендіреді.
Полицейлер сол күні баланы ата-анасына аман-есен тапсырды. Исламның айтуынша, оны сыныптастары «Мега» жанындағы мұз айдынына ойнауға шақырыпты. Оқушы сол жерде 9 сағатқа жуық уақыт жүріп қалыпты.
Мұрат Айтқожа.
Дерек, фото: Диапазон.