АСТАНА. 22 наурыз. Қазақстан құрамасы футзалдан 2016 жылғы Еуропа чемпионатына берілер жолдама үшін доданы жалғастырады. Румынияда өткен іріктеу турнирінде футболшыларымыз өз тобында екінші орын алды. Соңғы ойынды Грузияға қарсы өткізген ұлттық құрама 4:0 есебімен жеңіске жетті. Бұл туралы egemen.kz хабарлады.
Грузиямен болған ойында қазақстандық футболшылар айқын басымдық танытты. Матчқа толық бақылау жасаған Рикардо Какаудың шәкірттері кездесудің 11-минутында есеп ашты. Голдың авторы – Михаил Першин. Үзіліске дейін тағы бір ойыншымыз Николай Пенгрин мергендігімен көзге түсіп, есепті еселеді.
Екінші кезеңде де Грузия ешқандай қарсылық көрсете алмады. Нәтижесінде, 31-минутта Константин Чеботарев есепті 3:0-ге жеткізді. Ал ойынның нүктесін қазақ футболшысы қойды. Құрамадағы белді ойыншылардың бірі Шыңғыс Есенаманов кездесудің 39-минутында қарсыластарын біржола «нокаутқа» жіберіп, командасының төртінші голын соқты.
Осылайша іріктеу турнирінің 7-тобында ойнаған Қазақстан үш ойынның екеуінде жеңіске жетіп, 6 ұпайға ие болды. Біздің топта ойнаған Португалия мен Румыния да дәл осындай нәтиже көрсетті. Алайда, доп айырмасы арқылы Пиреней түбегінің өкілдері топ жарып, тікелей жолдамаға ие болды. Ал Қазақстан қарымта ойын өткізуге мүмкіндік беретін екінші орынға табан тіреді. Сондай-ақ, Румыния да жиған ұпайына байланысты жолдама үшін таласты жалғастырады.
Қарымта кездесулер 15 және 22 қыркүйек күндері өтеді. Бұл сында біздің қарсыласымыз Босния және Герцеговина, Венгрия, Беларусь, Әзербайжан, Чехия, Словакия және Румыния құрамаларының бірі болуы мүмкін.
Ал өз тобында бірінші орын алған Испания, Италия, Хорватия, Украина, Португалия, Ресей және Словения құрамалары тікелей жолдамаға ие болды. Сербия жарыс қожайыны ретінде жолдаманы іріктеусіз иемденді. Футзалдан Еуропа чемпионаты 2016 жылы 2-13 ақпан аралығында өтеді.
Айта кетейік, осы турнир барысында біздің жігіттер алғашқы ойынды Румынияға қарсы өткізіп 4:6 есебімен есе жіберді. Есесіне, екінші кездесуде азулы Португалияны қапы қалдырдық. Сол матчта футболшыларымыз 3:1 есебімен жеңген еді. Ал соңғы ойындағы нәтижені жоғарыда айттық.
Еламан Қоңыр.
Дерек: egemen.kz.
Сурет: afrk.kz.