АҚТӨБЕ. 13 тамыз. «Нұр Отан» партиясының Ақтөбе облыстық филиалында Қазақстан Републикасы Конституциясының 20 жылдығына арналған конференция өткізілді. Бұл туралы egemen.kz тілшісі хабарлады.
Облыстық мәслихат пен «Нұр Отан» партиясының облыстық филиалы бірлесіп ұйымдастырған конференцияға елімізге танымал қоғам қайраткерлері, облыстың құрметті азаматтары, облыстық мәслихаттың бірінші және бесінші шақырылымдарының депутаттары, қалалық және аудандық мәслихаттардың хатшылары, сайлау комиссияларының төрағалары, сот, прокуратура және әділет органдарының, мемлекеттік мекемелердің басшылары мен қызметкерлері, саяси партиялар мен үкіметтік емес ұйымдардың өкілдері қатысты.
Алқалы саяси жиынның шымылдығы «Қазақстан-Ақтөбе» телекомпаниясының Конституцияның 20 жылдығына арнап түсірген бейнефильмінің көрсетілімімен ашылды. Жиын басында облыстық мәслихаттыңи хатшысы Сәния Қалдығұлова сөз сөйлеп, Ата Заңымыздың айшықты қағидаттарына назар аударды. Ол біздің елімізде көп ұлттылық және ұлтаралық келісімге басымдылық берілетініне, 20 жыл бойы ұстанып келе жатқан Конституциямыздың бұл қағидаттың тиімді атқарылуына қызмет етіп келе жатқанына тоқталды.
Парламент Мәжілісінің екінші және үшінші шақырылымдарының депутаты, философия ғылымдарының докторы Амангелді Айталы «Конституция – Қазақстанның негізгі заңы» деген тақырыпта баяндама жасады. Ол мемлекет саясатының түп қазығы Ата Заң екеніне назар аудара келіп, еліміздегі Конституцияның қалыптасу жолдарын саралай әңгімеледі.
Ел егемендігінің, мемлекет тәуелсіздігінің берік тұғыры – Ата Заңымыз туралы тарих ғылымдарының докторы Нұртаза Абдоллаев, мәдениет қайраткері Еркін Құманбаеков толымды пікірлер айтып, тарих көшіндегі Ата Заңымыз бен мемлекеттік рәміздеріміздің маңызын аша түсті.
Конференция барысында айтулы датаға орай, еліміздің конституциялық негізінің қалыптасуы мен дамуына елеулі үлес қосқаны және еліміздің қоғамдық-саяси өміріндегі игілікті істері және белсенділіктері үшін бір топ ақтөбеліктерге «Қазақстан мәслихатына –
20 жыл» мерекелік медалі мен облыстық мәслихатттың Алғыс хаттары тапсырылды.
Сатыбалды Сәуірбай.
Дерек, сурет: egemen.kz.