АҚТАУ. 25 маусым. «Маңғыстаумұнайгаз» акционерлік қоғамы журналистерді алғаш болып құттықтады. Бұл туралы egemen.kz тілшісі хабарлады.
«Маңғыстаумұнайгаз» акционерлік қоғамының басшылығы журналистер күні мерекесі қарсаңында аймақтағы бірқатар журналистермен кездесу өткізді. Кездесуге компанияның бас директоры міндетін атқарушы Чжан Сюевэнь, бас директордың бірінші орынбасары Б.Иманбаев және компанияның департамент жетекшілері қатысты.
Компанияның тыныс-тіршілігі, жаңа технологиялардың өндіріске енгізілуі, кәсіподақ ұйымының жұмысы туралы бас директордың бірінші орынбасары Б.Иманбаев әңгімелеп берді.
Аймақ бойынша мұнайдың 31 пайызын, ал республика бойынша 8 пайызын өндіретін компания құрамында 15 мұнай және газ кен орны бар, олардың қалдықтағы өндірілетін қорлары 157 млн. тоннадан асады. Өткен жылы «Маңғыстаумұнайгаз» 6 млн. 273 мың тонна мұнай өндірген.
Журналистермен кездесу өткізіп, оларды кәсіби мерекелерімен құттықтау «Маңғыстаумұнайгаз» тарихында алғаш рет өткізіліп отыр. Бұл екіжақты жұмыстың ашықтығына, кедергісіз жолға қойылуына ықпал етеді деген сенім бар.
Гүлайым Шынтемірқызы.
Сурет, дерек: egemen.kz.