Кеше Орталық коммуникациялар қызметінде Елбасы кітапханасының атқарушы директоры Бейсембай Жұмабековтің және директордың орынбасары, талдау орталығының басшысы Тимур Шаймергеновтің қатысуымен «Қазақстан Республикасының Тұңғыш Президенті – Елбасы кітапханасының қызметі мен даму келешегі» тақырыбында баспасөз мәслихаты өтті.
Айта кетейік, бүгінгі күнге дейін кітапхананы 6 000 адам келіп көрді. 150-ден астам экскурсия өткізілді. Елбасы кітапханасына атбасын тіреген жоғары мәртебелі қонақтардың ішінде Қырғызстан президенті Алмазбек Атамбаев, Монако Князі Альбер II, Өзбекстан президенті Ислам Каримов, Ресей Федерациясының президенті Владимир Путин, Беларусь Республикасының президенті Александр Лукашенко бар.
Кітапхана қорында бұл күнде 19 100-ден аса кітап, 1 000 данадан астам мерзімдік баспа өнімдері мен электрондық басылымдар бар. Кітапхана қоры жуырда Н.Ә.Назарбаевтың «Мәңгілік Ел. Годы, равные векам. Эпоха, равная столетиям» деген жаңа басылыммен толықты. Бұл – Қазақстанның Тәуелсіздік жылдарында өткен жасампаз жолын жан-жақты көрсеткен алғашқы кітап.
Сондай-ақ, бұл рухани ордада сирек, коллекциялық және көне басылымдар бар, соның ішінде: Мемлекет басшысына Миландағы Амброзиан кітапханасы сыйға тартқан, Леонардо да Винчидің эскиздерінен тұратын альбом; 30 сақтау бірлігінен тұратын Қасиетті Құран басылымдарының коллекциясы; қазақ ғарышкері Т.Мұсабаев ғарышқа апарып әкелген Құран; ертеректе орыс императоры Александр ІІ кітапханасында сақталып келген Шлоссердің бүкіләлемдік тарихы; бір жарым беті Әбілхайыр ханға арналған, 1838 жылы жарық көрген энциклопедиялық лексикон.
Президенттің жеке кітапханасын Н.Ә.Назарбаевқа әр жылдары жеткізілген басылымдар, қолтаңбамен сыйға тартылған кітаптар, сондай-ақ, Елбасы өзі 60-жылдардан бастап жинаған жеке (үй) кітапханасы құрайды. Қорда Нұрсұлтан Назарбаев қолданған, жұмыс барысында ерекшелеген, бетіне белгі қалдырған кітаптар айрықша орын алады.
Кітапханадан америкалық East View Information Services, Inc компанияларының, мерзімдік басылымдарының электрондық мәліметтер базасы, сондай-ақ, ресейлік Polpred.com мәліметтер базасы қолжетімді. Мұнда электрондық кітаптар да бар. Толық мәтіндік, анықтама-библиографиялық, рефераттық журналдар коллекцияларына қол жеткізуге барлық жағдай жасалған.
Кітапхана қорында бүгінде 400-ге жуық экспонат бар. Бұлар – сыйлықтар, Елбасының жеке заттары, өнер бұйымдары, тарихи раритеттер, түрлі елдердің Мемлекет басшылары мен ресми өкілдерінің, халықаралық компаниялар мен ұйымдардың, белгілі мемлекет, саясат және қоғам қайраткерлерінің, белгілі спортшылар мен өнер қайраткерлерінің сыйлықтары.
Кітапханада экспозиция аумақтарын безендіру, мемлекетіміздің атаулы күндеріне және тарихи мәні бар оқиғаларына байланысты тақырыптық көрмелер дайындау жұмыстары тұрақты жүргізіледі.
Елбасы кітапханасының экспозиция-көрме қызметі Н.Ә.Назарбаевтың жасампаз ойлары мен бастамаларын тақырыптық тұрғыдан көрсетуге бағытталған. Келушілер экспозициядан Мемлекет басшысының тұжырымдамалық ойларының жан-жақты қырларымен, Тәуелсіз Қазақстанның табыстарымен және жетістіктерімен терең таныса алады. Тақырыптық экспозицияның экспонаттары Тұңғыш Президенттің қызметін айшықтайды және Мемлекет басшысының көп қырлы әрі бірегей тұлғасын жан-жақты ашып көрсетеді.
Раушан ТӘУІРХАНҚЫЗЫ,
журналист.