АСТАНА. 17 тамыз. Бүгін Қазақстан Республикасы Қорғаныс министрлігінің құрметті қарауыл ротасы 3 қыркүйекте Қытайдың Бейжің қаласында өтетін Екінші Дүниежүзілік соғыстағы жеңістің 70 жылдығына арналған әскери парадқа қатысуға аттанды. Бұл туралы egemen.kz тілшісі хабарлады.
Осыған байланысты жақында министрліктің құрметті қарауыл ротасының қорытынды саптық байқауы өтті.
Алаңда 68665 әскери бөлімінен 100-ден астам әскери қызметші командирімен шығып, сапқа тұрды. «Әскери қызметшінің саптық адымы өз елінің және армияның қуаттын,беріктігі мен мақтанышын көрсете алуы тиіс», деп түсіндірді өз жауынгерлеріне капитан Мақсат Байжігітов.
Алдағы парадқа әскери қызметшілер бірнеше күн дайындалды, сондықтан қазір олар 100 пайызға дайын. Олар Бейжің қаласына аттанып, кытайлық әскери қызметшілермен бірлескен жаттығуларға кіріседі.
Қорғаныс министрлігі құрметті қарауыл ротасының қатарына қазақстандық армияның бетке ұстар әскери қызметшілері іріктеліп алынды. Еліміздің Қарулы Күштерін олар бірінші таныстырып отырған жоқ. 2002 жылы құрылған рота республикалық деңгейдегі, халықаралық ауқымдағы барлық салтанатты және мерекелік іс-шараларға қатысып келеді. Сонымен қатар Қазақстан Республикасы Перзидентінің инаугурациясына, «КАDEX» көрмесіне, Астанадағы әскери шеруге, 2010 жылы Мәскеуде өткен әскери парадқа қатысқан.
Дастан Кенжалин.
Дерек, сурет: Қазақстан Респубикасы Қорғаныс министрлігі.