Шымкент қаласының солтүстік айналма жолында жолдың бетон жабынынан ақау анықталғаннан кейін жол қызметтері жөндеу жұмыстарын жүргізіп жатыр. Бұл туралы ҚазАвтоЖол компаниясының баспасөз қызметі хабарлады, деп жазады Egemen.kz
Жол жабынындағы зақым 7 маусым күні жоспарлы тексеру барысында «Шымкент қаласының солтүстік айналма жолы» автожолының 2257-шақырымында анықталған.
Алдын ала мәлімет бойынша, ақаудың пайда болуына ауа температурасының күрт көтеріліп, +35...+37 градусқа дейін жетуі себеп болуы мүмкін. Аптап ыстықтың әсерінен бетон плиталар кеңейіп, соның салдарынан жол жабынында деформация пайда болған.
Мамандар жүргізушілерден жөндеу жұмыстары жүргізіліп жатқан учаскеде жылдамдық режимін сақтап, барынша мұқият болуды ескертеді.