Бұдан былай Орталық Америкада орналасқан Гватемала мемлекетін комедия актері Джимми Моралес басқарады. Бүгінде ол президент лауазымындағы жаңа қызметін бастап кетті.
Жергілікті телевидениенің хабарлауынша, ұлықтау рәсімі ел астанасы – Гватемала қаласындағы ұлттық театрда өткен. Салтанатты жиында Джимми Моралес ант қабылдап, президенттік лентаны қабылдап алды. Аталған рәсімге он шақты мемлекеттің басшысы, сондай-ақ, АҚШ-тың вице-президенті Джо Байден қатысты. Д.Моралес 2015 жылдың қазан айында өткен сайлаудың екінші кезеңінде жеңіске жетіп, Гватемаланың 50-ші президенті атанды.
Негізі гватемалалықтар үшін Д.Моралес бірінші кезекте комедия жанрындағы актер әрі режиссер ретінде жақсы таныс. Актердің жергілікті телеарналардың бірінен жексенбі сайын беріліп отыратын әзіл-оспақ бағдарламасы зор сұранысқа ие. Сондай-ақ, 46 жастағы саясаткер, төрт баланың әкесі кәсіпкерлікпен де айналысады. Одан бөлек, су жаңа президент қорғаныс және қауіпсіздік салалары бойынша мамандықтардың магистранты екенін де атап өткен жөн.
Саяси сахнадағы қадамын енді бастаған Моралес жаңа қызметінде Гватемала үшін ең маңызды мәселенің бірі – сыбайлас жемқорлықпен күрес жүргізуге уәде берді. Сондай-ақ, ол жұмысының ең басты бағыты ретінде әлеуметтік жағдайы нашар жергілікті халықтың азық-түлік мәселесін шешу, білім беру жүйесіндегі өзекті сұрақтарды қолға алу және кәсіпкерлікті дамытуға қолғабыс жасау екенін атап көрсетті.
Еламан ҚОҢЫР,
«Егемен Қазақстан».