АСТАНА. 16 қаңтар. Содырлардың Буркина-Фасоның астанасы – Уагадугу қаласындағы шабуылы кезінде 27 адам қаза болды. Бұл туралы РИА «Новости» ақпарат агенттігіне сілтеме жасаған жасаған egemen.kz тілшісі хабарлады.
Францияның аталған елдегі елшісі Жиль Тибоның айтуынша, Уагадугудегі мейрамхана мен қонақ үйді басып алу кезінде қаза болған құрбандардың саны 27-ге жеткен. Бұдан бұрын шабуыл салдарынан 23 адамның көз жұмғаны туралы хабарланған еді. Жиль Тибо Twitter-дегі жеке парақшасында: «Құрбандар саны 27-ге жетті. Қаза болғандардың ұлттары әлі белгісіз», – деп жазған. Ол сондай-ақ, күш құрылымдарының қонақүйден 150 адамды қауіпсіз жерге шығарып, қажетті дәрігерлік көмек көрсеткені жөнінде де мәлімдеген. Ғимаратта болғандардың арасында 18 елдің өкілі бар.
Естеріңізге сала кетейік, кеше, яғни, 15 қаңтар күні белгісіз біреулер дәмханаға оқ жаудырып, Уагадугудегі Splendid қонақ үйіндегі адамдарды кепілдікке алған болатын. Бұл қонақ үйге батыс елдерінің өкілдері, соның ішінде БҰҰ-ның қызметкерлері жиі тоқтайтынын атап өткен жөн.
Францияның дипломатиялық өкілдері мен ресейлік құрметті консул бұл қанқұйлы оқиғаны террористердің шабуылы деп атады. SITE мониторингтік топтың ақпаратына сәйкес, Буркина-Фасодағы қанды шабуылға қараша айында Мали астанасындағы қонақ үйді басып алған «Әл-Мурабитун» лаңкестік тобының тікелей қатысы бар.
Еламан Қоңыр.
Дерек: РИА «Новости».
Сурет: AFP.