Қазіргі таңда Жер бетіндегі халықтардың жартысынан астамы, яғни 3,6 млрд. бөлігі кедейшілікте өмір сүреді. Онсыз да ішерге – ас, киерге киім таппай, қиналып жүрген қамкөңіл жандардың жағдайы соңғы бес жылда тағы 1 трлн. долларға төмендеп кеткен. Ал жаһанның жарты байлығын иемденіп отырған санаулы миллиардерлердің қазынасы осы уақыттың ішінде тек көбейіп отырған екен.
Кедейшілікпен күресте белсенділік танытып жүрген Oxfam коммерциялық емес ұйымының мәлімдеуінше, 2010 жылдан бері қос таптың арасы едәуір алшақтаған. Атап айтқанда, бүгінде жарты әлемнің қолындағы қаржыға тең байлыққа иелік етіп отырған Жер бетіндегі ең бай 68 адам бес жылдың ішінде 1,76 трлн. долларға байыған. Осы ретте, 2010 жылы кедей-кепшіктің, яғни әлем халқының жартысының байлығы ең бай 388 адамның есепшотындағы қаржымен тең болғанын атап өткен жөн.
Ұйымның мәлімдемесіне қарағанда, бұл мәселеге салықтағы жеңілдіктер, еңбекақысындағы айырмашылықтар, жұмысшыларға берілетін сыйақылардың қысқартылуы сынды тетіктер себеп болған. Сондай-ақ, бұған бүгінгі жаһандық экономикалық дағдарыстың да салқыны тигені сөзсіз. Өйткені, қазіргі қаржылай қыспаққа кедей тұрмақ, байлардың өзі шыдас бере алмай отыр. Мәселен, 2016 жылдың алғашқы екі аптасында-ақ әлемнің ең қалталы 400 адамы дағдарыс салдарынан 305 млрд. долларынан айырылып, жиған-тергенін желге ұшырған.
Еламан ҚОҢЫР,
«Егемен Қазақстан».