ҚАРАҒАНДЫ. 28 қаңтар. Қарағанды облысында бірқатар кадрлық тағайындаулар болды. Бұл туралы облыс әкімінің баспасөз қызметіне сілтеме жасаған egemen.kz тілшісі хабарлады.
2016 жылдың 14 қаңтардағы Қазақстан Республикасының Мемлекеттік қызмет істері министрлігінің жауапты хатшысының бұйрығына сәйкес, Қазақстан Республикасының Мемлекеттік қызмет істері министрлігінің Қарағанды облысы бойынша департаментінің басшысы, Әдеп жөніндегі кеңестің төрағасы болып Жандос Шералыұлы Сәрсенов тағайындалды.
Ж.Сәрсенов 1979 жылы дүниеге келген, «заңгер-халықаралық саясат білгірі» мамандығы бойынша Абай атындағы Алматы мемлекеттік университетін (2001), «мемлекеттік басқару және менеджмент» мамандығы бойынша Лондон экономика және саяси ғылымдар мектебін (2010) тәмамдаған.
2001-2011 жылдары Қазақстан Республикасы Парламенті Мәжілісінің аппаратында әртүрлі лауазымдарда қызмет еткен.
2011-2012 жылдары – Солтүстік Қазақстан облысы әкімі аппараты басшысының орынбасары.
2012-2013 жылдары Қазақстан Республикасының Мемлекеттік қызмет істері агенттігінің Орталық аппаратында жауапты мансаптарда қызмет етті.
2014 жылдың қарашасынан 2016 жылдың қаңтарына дейін Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Қарағанды облысы бойынша департаменті басшысының орынбасары – Қарағанды облысындағы Тәртіптік кеңестің төрағасы қызметін атқарды.
2016 жылдың қаңтарынан бастап Қазақстан Республикасының Мемлекеттік қызмет істері министрлігінің Қарағанды облысы бойынша департаментінің басшысы, Әдеп жөніндегі кеңестің төрағасы лауазымына тағайындалды.
Қазақстан Республикасының Мемлекеттік қызмет істері министрлігінің Қарағанды облысы бойынша департаменті басшысының орынбасары, Әдеп Кеңесі хатшылығының меңгерушісі болып Берік Мұхамеджанұлы Ахметов тағайындалды.
Берік Ахметов 1961 жылы дүниеге келген, «заңгер» мамандығы бойынша Қарағанды мемлекеттік университетін (1987), «есеп және аудит» мамандығы бойынша Қарағанды экономикалық университетін (2007) тәмамдаған. Қарағанды облысының мемлекеттік қызмет істері басқармасында 2012 жылдан бастап қызмет етеді, бұған дейін 25 жыл прокуратура органдарында қызмет атқарған, Қарағанды облысының бірқатар қалалары мен аудандарында прокурор лауазымында болды.
Тағайындауға дейін Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Қарағанды облысындағы Тәртіптік кеңесі хатшылығының меңгерушісі қызметін атқарды.
Қазақстан Республикасының Мемлекеттік қызмет істері министрлігінің Қарағанды облысы бойынша департаменті басшысының орынбасары болып Талант Бақбергенұлы Медет тағайындалды.
Талант Медет 1980 жылы дүниеге келген, «тарихшы» мамандығы бойынша Қарағанды мемлекеттік университетін (2001), «заңгер» мамандығы бойынша «Фемида» заң академиясын (2005) тәмамдаған.
2004-2008 жылдары Қарағанды облысының ішкі саясат басқармасында әртүрлі лауазымдарда қызмет атқарған. 2008 жылдан 2014 жылға дейін Қарағанды облысының мемлекеттік қызмет істері басқармасында консультант, бөлім басшысы лауазымдарында болды. 2014 жылдан бастап - Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Қарағанды облысы бойынша департаментінің мемлекеттік қызметті өткеру бөлімінің басшысы.
Тағайындауға дейін Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Қарағанды облысы бойынша департаментінің Мемлекеттік қызмет және сыбайлас жемқорлықтың алдын алу басқармасының басшысы қызметінде болды.
Қайрат Әбілдинов.
Дерек, сурет: Қарағанды облыс әкімінің баспасөз қызметі.