АСТАНА. 24 қаңтар. Бүгін ВТБ Бірыңғай лигасы шеңберінде «Астана» баскетбол командасы сырт алаңда Эстонияның «Калевімен» сынға түсті. Нәтижесінде елордалықтар 86:80 есебімен жеңіске жетті. Бұл туралы egemen.kz тілшісі хабарлады.
Эстония астанасы – Таллин қаласында өткен кездесудің бірінші кезеңі «Астананың» пайдасына 24:21 есебімен аяқталды. Екінші кезеңде де біздің команда басым болды (23:17). Есесіне, үшінші онминуттықта «Калев» ойыншылары ширақтық танытып, 25:18 есебімен жеңіске жетті. Алайда, төртінші бөлікте тағы да астаналықтардың мерейі үстем болды (21:17).
Осылайша, жалпы нәтижеде жеңіске жеткен Рамунас Бутаутастың шәкірттері турнир кестесіндегі жағдайын айтарлықтай жақсартып алды. Бүгінде «Астана» 9-орында тұр. Баскетболшыларымыз келесі кездесуін 1 ақпанда өз алаңында Краснодардың «Локомотив-Кубань» командасымен өткізеді.
Еламан Қоңыр.
Дерек: egemen.kz.
Сурет: bcastana.kz.