АСТАНА. 10 ақпан. Мемлекет басшысы Нұрсұлтан Назарбаевтың Жарлығымен Ерлан Сағадиев Қазақстан Республикасының Білім және ғылым министрі қызметіне тағайындалды. Бұл туралы Ақорданың баспасөз қызметіне сілтеме жасаған egemen.kz тілшісі хабарлады.
Жарлық мәтінінде: «Ерлан Кенжеғалиұлы Сағадиев Қазақстан Республикасының Білім және ғылым министрі болып тағайындалсын», – делінген.
Ерлан Сағадиев 1966 жылы 1 ақпанда туған. 1990 жылы әл-Фараби атындағы Қазақ ұлттық университетін экономика мамандығы бойынша бітірген. Сондай-ақ, 1993 жылы АҚШ-тың Миннесота штатындағы университетті қолданбалы экономика мамандығы бойынша бітірді. Ғылыми дәрежесі – магистр.
Ерлан Кенжеғалиұлы қызмет жолын 1990 жылы бастады. Содан бері әртүрлі лауазымда қызмет атқарды. Олардың қатарында премьер-министрдің кеңесшісі (2012-2013), Индустрия және жаңа технологиялар вице-министрі (2014-2015) сынды лауазымдар бар.
Еламан Қоңыр.
Дерек: egemen.kz.
Сурет: kapital.kz.