Аптаның соңы, ақпанның аяғы – жыр алыбы Жамбыл Жабаевтың туған күні. Осыған орай, кеше «Қазақстан» Ұлттық арнасының тапсырысымен дайындалып, ақынның 170 жылдығына арналған «Жамбыл» сериалының премьерасы өтті.
– Жамбыл – сарқылмайтын тақырып. Бұл бабамыз туралы қаншама ғылыми, әдеби, тарихи еңбектер жазылса да көптік етпейді. Ақын өмірден өткеннен кейін біз оның сарқылмас мол мұрасының бағасына жете алдық па? Міне, осы мәселелер бүгінгі әдебиет зерттеушілерін толғандыруы керек. Жамбылдан үйрену, Жамбылмен іштей сырласу, оның рухын сезіну – біз үшін маңызды. Өйткені, ол – ой алыбы, сөз зергері. Кезінде Жамбыл – Алатау, Жамбыл – Гималай деген теңеулер болған. Бұның барлығы жайдан-жай айтылған пікірлер емес. Оларда үлкен мән бар. Сондықтан, ұлы жырау – сарқылмас қазынамыз. Ол – рухани биіктік, рухани тереңдік», – деп ағынан жарылды мемлекет және қоғам қайраткері Қуаныш Сұлтанов.
Бұл фильмде басты рөлде театр мен кино актері Байғали Есеналиев ойнайды. Ал күйші Дина Нұрпейісованы елімізге белгілі өнер шебері Айгүл Үлкенбаева бейнелесе, атақты әнші Күләш Байсейітованы Әйгерім Уалжанова сомдаған.
Телесериалдың негізгі көріністері табиғаты әсем Алматы облысының Үшқоңыр баурайында, Жамбыл облысында түсірілді. Фильмде тарихи тұлғаның өмірбаяны ғана емес, ХХ ғасырдың өзі өмір сүрген тұсындағы ел жағдайы да суреттелген. Сонымен қоса, бұған дейін көп айтыла қоймаған, ақын өмірінен алынған қызықты деректер де көрсетіледі. Соның бірі – Жамбыл мен Бұрымның бір-біріне деген махаббаты. Түсірілім тобы декорацияларға, актерлердің костюмы мен образдарына баса назар аударған. Сол арқылы Жамбыл өмір сүрген дәуірдің толықтай шындығын көрсетуге тырысқан.
Астанадағы «Қазмедиа орталығында» өткен фильм премьерасында белгілі мемлекет және қоғам қайраткері Өмірбек Байгелди, танымал кинорежиссер Сламбек Тәуекел сөз сөйлеп, жаңа лентаның жақсы қасиеттері жайында жылы лебіздерін білдірді.
Рауан ҚАЙДАР,
«Егемен Қазақстан».