Мәскеуде Дүниежүзі қазақтары қауымдастығы Төрағасының бірінші орынбасары Талғат Мамашев Қазақстанның Ресейдегі Төтенше және өкілетті елшісі Марат Тәжинмен кездесті. Онда Ресей қазақтарының және олардың ұлттық мәдени орталықтарының қазіргі жай-күйі мен болашағы талқыланды.
Кездесуге Ресей қазақтарының федералдық ұлттық мәдени автономиясының президенті Тоқтарбай Дүйсенбаев пен Мәскеу қазақтарының «Мұрагер» ұйымының жетекшісі Ерназар Нұриев қатысты.
Ресми деректер бойынша қазір Ресейде тұрып жатқан қазақтардың саны 1 миллионға жуықтайды. Олар негізінен Қазақстан шекарасына таяу Алтай, Новосібір, Омбы, Челябі, Қорған, Орынбор, Саратов, Волгоград, Астрахань облыстарында орналасқан. Ал еуропалық бөлігіндегі қазақтар негізінен қалаларда тұрады және олардың саны айтарлықтай көп емес.
Ресейдегі 30-дан астам ұлттық-мәдени автономиялар арасында 18-ші болып құрылған Ресей қазақтарының федералдық ұлттық мәдени автономиясына келесі жылы 10 жыл толғалы отыр. Осыған орай мамыр айының алғашқы жартысында М.Тәжин Т.Дүйсенбаевты арнайы қабылдап, Ресей қазақтарының Қазақстанмен мәдени және экономикалық қарым-қатынасын жандандыру жайы бірлесіп талқыланатын болады.
Ерлік ЕРЖАНҰЛЫ
МӘСКЕУ