Жуырда отандық «Жетінші арна» телеарнасының басшылығы баспасөз мәслихатын өткізіп, ойын-сауық бағдарламаларын дайындайтын әлемдік жетекші ұйым – Endemol компаниясының стратегиялық әріптесі «ВайТ Медиа» компаниясымен ұзақ мерзімді келісім жасағандары жөнінде хабарлады. Осы келісім бойынша «Жетінші арнаның» жалпы стратегиясы мен хабар тарату мәнерінде өзгерістер болмақ.
Сондай-ақ, «Жетінші арна» өзінің логотипін, фирмалық стилін өзгертіп, ауқымды республикалық жарнама науқанын өткізеді. Мақсаты мынадай: «Жетінші арнамен бірге өзгеретін кез келді». Бұл дегеніңіз, әлемдік стандартқа сәйкес құрылым таңдаған телеарна өз көрермендерінің де сол деңгейде болғанын қалайды деген сөз.
«Жетінші арна» директорлар кеңесінің төрайымы Бибігүл Жексенбайдың айтуынша, «ВайТ Медиа», сол арқылы Endemol-мен әріптестік «Жетінші арнаның» даму тұжырымдамасына енгізілген сәтті бастама. «Енді эфирге 80 пайыз жаңа контент шығады. Бұл қазақстандық рынокқа жолдама алған су жаңа бағдарламалар болмақ, ал еліміз үшін арнайы дайындалатын тележобаларды да осы жылы көрсете бастаймыз. Телеконтент өндірісі елімізде енді ғана дами бастады. Ұлттық фильмдер мен бағдарламалардың үлесі аса ірі телеарналар эфирінің 20 пайызына да жете алмайды. Сондықтан біз телеөндіріс саласында сараптама жүргізу шеберлігін меңгерген және жобаларды эфирге шығарудың әртараптандырылған портфелін иеленген сенімді әріптестермен ұзақ мерзімді келісім жасауға шешім қабылдадық» – дейді Бибігүл Жексенбай.
«Жетінші арна» бізге серіктес болу арқылы 2011 жылға жоспарлап отырған жаңа жобаларымызға қол жеткізіп отыр. Сондай-ақ, «ВайТ Медиа» енді тұңғыш рет ұлттық телеөнім жасауға араласады. Көрерменнің өз отанының, өз ұлтының контентіне қызығушылығы әлемдік үрдіс болып табылады. Мәселен, Ресейде жергілікті телеөнімдердің үлесі аса жоғары деңгейде, яғни 80 пайызға жуық. Ал, Қазақстанға ондай көрсеткішке жету үшін біраз уақыт керек»-деді «ВайТ Медианың» бас продюсері Тимур Вайнштейн.
Ал, Endemol Group бас директоры Марина Ульямстің сөзіне сенсек, Орталық Азияның, оның ішінде Қазақстанның телевизиялық рыногы өте тартымды. Өсу қарқыны жағынан біз еуропалық рыноктан 50 пайыз алда келеді екенбіз. «Алайда, әлемдік телевизиялық рыноктың ойыншылары үшін Қазақстан әлі де толық игерілмеген аумақ болып қалып отыр. Сондықтан жас әрі қарқынды дамып келе жатқан «Жетінші арнамен» әріптестік орнату, менің ойымша, барлық қазақстандық рынок үшін елеулі оқиға әрі сапалы телехабар таратудың жаңа деңгейіне көшу» – дейді ол.
Айгүл СЕЙІЛОВА.