Бес кезеңнен тұратын сайысқа облыстық соттың әкімшілік істер жөніндегі сот алқасының төрағасы Жанат Оспанова, Сыбайлас жемқорлыққа қарсы іс-қимыл агенттігінің Қызылорда облысы бойынша департаменті басшысының бірінші орынбасары Айдос Жүнісов, Қорқыт ата атындағы Қызылорда университеті сыбайлас жемқорлыққа қарсы комплаенс-офицері Әлібек Жаппасбаев қазылық етті.
«Сәлем – сөздің анасы» деп аталатын алғашқы бөлімнен-ақ студенттердің сайысқа тыңғылықты дайындалғаны байқалды. Кейбір топ өздерін әнмен таныстырса, тағы бірі қоғамдағы келеңсізсіздікті көрсететін шағын қойылым қойды. Командалар өнері 5 балдық жүйе бойынша бағаланды.
Қоғамда заң мен тәртіп идеологиясын терең орнықтыру мақсатында ұйымдастырылған сайысқа қазылық еткендер жастардың жан-жақты әзірленгенін айтады. «Студенттердің ой-өрісін кеңейтіп, сала маманына қажетті қасиеттерге баулуды көздейтін сайыста жастар білімдерінің тереңдігін, шығармашылық ізденістерін көрсетті. Осындай креативті жастардан білікті маман шығарына сенім мол», дейді облыстық соттың әкімшілік істер жөніндегі сот алқасының төрағасы Жанат Оспанова.
Ал университеттегі сыбайлас жемқорлыққа қарсы комплаенс-офицері Әлібек Жаппасбаев бүгінгі іс-шарада бірінші курс студенттері заң мен тәртіп әділеттіліктің басты шарты екенін көрсете алғанын атап өтті.
Сайыс қорытындысы бойынша «Ю-24-7» тобы І орын иеленсе, одан кейінгі орындарды «Ю-24-1» және «Ю-24-9» командалары алды. Ал сайыстың бас жүлдесі «Ю-24-3» тобына бұйырды.
Үздік командаларға арнайы дипломдар мен алғыс хаттар табысталды.
Қызылорда
