Ол саптан шығып, алдымен ант берген соң, сүйіктісі Томириске үйленуге ұсыныс тастады. Әскери тәртіп салтанат құрған салмақты жиын бір сәтте қуаныш пен әсерлі көрініске ұласып, екі жас көптің ықыласына бөленді.
Болашақ жарының келісімін алған жас сарбаз әскерден оралған соң үйлену тойын жасауға дайын екенін мәлімдеді. Бұл оқиғаға әскери бөлімнің жеке құрамы, 3000-ға жуық ата-ана мен сарбаздардың туыстары куә болды.
Іс-шара барысында әскери бөлім командирі Жандар Әшірбеков сөз сөйлеп, әскери анттың әр сарбаз үшін үлкен жауапкершілік екенін атап өтті.
«Әскери ант – жай ғана сөз емес, ол – Отанға, халыққа, ата-анаға деген адалдықтың айқын көрінісі. Сіздер артылған сенімді ақтап, Ұлттық ұлан жауынгеріне лайықты қызмет атқарады деген үміттемін», деді ол.
Осы күннен бастап қатардағы А.Абдрахов пен басқа да сарбаздар қала көшелері мен маңызды іс-шаралар кезінде жауынгерлік қызмет атқаруға кіріседі.
Рәсім соңында жеке құрам сап түзеп, әскери техникалардың қатысуымен шеру өтті.
