Қорлар ынтымақтастықты кеңейтеді
Әзербайжан астанасы − Бакуде Қазақстан Республикасының Тұңғыш Президенті – Елбасы қоры мен Гейдар Әлиев қоры әлеуметтік-мәдени, ғылыми және білім беру салаларындағы өзара ынтымақтастық туралы меморандумға қол қойды, деп хабарлады Сыртқы Істер министрлігінің баспасөз қызметі.
− Біздің қорлардың қызметі негізінен бір-біріне ұқсас келеді. Мысалы, сіздердің Қор білім беру, мәдениет, ғылым және әлеуметтік салалардағы қоғамдық маңызы бар жобаларды жүзеге асыруға белсенді қатысады. Бізде де солай. Осы ынтымақтастықтың арқасында біздер мәдениет пен ғылым салаларына қатысты жобаларды іске асыруда табысқа жететінімізге сенімдімін. Оның ішінде талантты жастар мен жас ғалымдарға қолдау көрсету де бар, − деді Қазақстан Республикасының Тұңғыш Президенті – Елбасы қорының атқарушы директоры Қанат Жұмабаев.
Меморандумға қол қою рәсіміне Қазақстанның Әзербайжандағы елшісі Бейбіт Исабаев та қатысты. Ол сөзінде екі қор арасындағы ынтымақтастық маңыздылығымен ерекшеленетінін атап өтті. Қол қою рәсімінен кейін өткен кездесуде екі қор арасындағы байланысты кеңейту мүмкіндігі талқыланды. Сонымен қатар, тараптар бірлескен жобаларды жүзеге асыру Қазақстан мен Әзербайжан халықтарының қарым-қатынасын нығайтуға қызмет ететініне назар аударды.