Жетісу жеріндегі «Рухани керуен»

Орталыққа жақын сана­латын Ақсудан шалғай­дағы Алакөлге дейінгі аралықты жүріп өтіп, халықпен кездесу­лер өткізіп, әр аймақтың қасиет тұтар, мақтан етер жерлеріне ат байлап, бірнеше шараны қатар атқарып отырған «Рухани керуен» жобасын жүзеге асы­ру­шылар алдымен Ақсу ауда­ны, Жансүгіров кентіндегі жыр дүлдүлі Ілияс ақынның ес­керт­кішіне гүл шоқтарын қойды.

Бұдан соң Молықбай атын­дағы аудандық мәдениет үйін­де өткен салтанатты жиында Ал­маты облыстық дін істері бас­қар­масынының басшы­сы, керуен­нің жолбасшысы Рах­мет Есдәулетов Елбасы ұсын­­ған бағдарламалық мақа­ла­ны насихаттау мақсатында өз­дерінің атқарып жатқан жұ­мыстарымен таныстырды.

Бүгінгі күннің бас ауруына ай­налған мәселе – дін атын жа­мылып, арандатушылықпен айналысып жүрген ағымдар жайлы жүргізген зерттеу жұ­мыс­­тарынан дерек келтірді. Бағ­дар­ламада айтылған ұлт­тық құндылықтардың қай­нар бұлағы тарихымыз бен мәдениетімізді, салт-дәстүрі­мізді, туған жеріне туын тігіп, өсіп-өнуіне жағдай жасамаққа тырысып, игі істердің ұйыт­қысы болып жүрген азамат­тарды насихаттау басты мақ­саттардың бірі екеніне тоқ­талды. «Нұр Отан» партия­сы облыстық филиалы төраға­сының бірінші орынбасары Ғалиасқар Сарыбаев та өт­кен мен бүгіннің арасал­мағын анықтап алмай, іс атаулының өрге жылжы­май­тынын, тарихты, дәстүрді білмей, ата-бабаның жолын құрметтемей рухани кемел­дікке жету мүмкін емесін айтты. «Рухани керуеннің» мүшесі ақын Кәмнұр Тәлімұлы мен облыстық «Жетісу» газеті бас редакторының орынба­сары Жұматай Әміреев өз атта­рынан тілек білдіріп, бұл керуеннің, жалпы, «Рухани жаңғырудың» басы өз ауы­лыңды, туған жеріңді, ауылың­нан шыққан жақсы-жайсаң­дар білу мен құрметтеуден баста­латынын тілге тиек етті. Об­лыс­тық Сүйінбай атындағы филармонияның әншілері Абылай Қармысов, Құралай Шаяхметова мен Алматыдан арнайы келген жыршы-тер­меші Әбіш Әділбеков өнер көрсеткен сахнаға жергілікті өнер­­паздары да шығып, байып­ты басқосуды мерекелік көңіл күйге ұластырды.

Бұдан соң керуен мүшелері бірнеше топқа бөлініп, кесте бойынша жоспарланған жұмыс­тарына кірісіп кетті. Бір қуан­тарлығы, аудан орталығында деструктивті діни ағымдарға ілесіп, тіркеуге алынған бірде-бір адам болмады. Әлеумет­тік, денсаулық саласы маман­дары тұрғылықты жұртпен кез­де­сіп, сан сауалдарына жауап бер­се, бір тобы аудан ақсақал­дары­мен жүздесіп, емен-жарқын әңгіме өрбітті.

Енді бір тобы жастармен дидарласып, дін мен дәстүр негізінде қойылған сұрақ­­тарға егжей-тегжейлі жауап берді. Сапардың қоры­тын­­дысы ретінде орталық ста­­­дионда шағын футболдан жарыс ұйымдастырылды.

Әрі қарайғы сапар Сарқан ауданында жалғасып, қазақ­тың тұңғыш инженер-ғалымы Мұха­метжан Тынышпаев ес­керт­кішіне гүл шоғы қойылып, құрмет көрсетілді. Мақсат ай­қын, міндет түсінікті болған соң, әр ауданға ат басын тіреген сайын негізгі бағыттан ауыт­қымай, ұғындыру, түсіндіру жұмыстарымен бірге, діни жат ағымдардан сақтандыру, діни сауат беретін кітапшалар тарату, қаймағы бұзылмаған діннің қадір-қасиеті жайлы ақпарат беру, әртүрлі жас­та­ғы тұрғындармен кезде­су, аудандағы негізгі қиыншы­лықтарды біліп, сол бойынша жұмыс істеу жоспарын құру, жалпы, облыстағы діни ахуал­дан хабардар ету назар­дан тыс қалған жоқ.

Сарқан ауданындағы бір ерекшелік керуенге мүше болып, жолға шыққан өнер­паз­­дардың базардың қақ ор­тасын сахна жасап, көрсет­кен өнері болды деуге болады. Мұнда да аудандық спорт кешенінде шағын футболдан бірнеше команда арасында жарыс өтті.

Алакөл ауданына келгенде де дәстүр бұзылған жоқ. Әуелі Ұлы Отан соғысы ардагер­лері мен тыл еңбеккерлеріне ар­нал­ған ескерткішке, одан кейін Дінмұхамед Қонаевтың ескерткішіне гүл шоғын қойып, рухқа тағзым жасап, аруаққа құрмет көрсетті. Бұдан соңғы атқарылған шаралар негізінен жоғарыдағы кесте бойын­ша жүрді.

Әу баста Талдықорған қала­с­ындағы «Жастар» саяба­ғында салтанатты ашылу болып, елдің ақ батасымен сапар­ға шығарда бұл жобаның таныс­тырылымы өткен.

«Руха­ни керуен» жобасы аясында құрылған жұмыс тобы «Рухани жаңғыру: ел ертеңінің бастауы» тақырыбында зиялы қауым өкілдерімен кездесу өткізіп, «Денсаулық – болашақ кепілі» тақырыбында діни сенімдер себептерінен екпе, қан құюдан бас тартқан, жат ағымға бет бұрған азаматтармен сөйлесіп, оң жолға салу, діннің негізгі мақсаты жайлы түсіндіру жұ­мыстарын жүргізеді. «Рухани жаңғыру: туған жер – алтын бесік» атты сурет және кітап көрмесі, «Ақпараттық түсін­діру жұмысы – діни сауат­тылықты арттырып, рухани байлығымызды дәріптейді» тақырыбында дінтанушы ғалымдармен дөңгелек үстел форматындағы кездесулер ұйымдастырып, «Рухани мұра» атты концерттік бағдарламасы арқылы ән мен жыр ғана емес, арнайы сахналық қойылымдар дайындап отырғандарын жет­кіз­ген. Және, бұл сапар үш айға созылатынын, облыстың бүкіл ауданын аралап шығатынын, керуеннің құрамында 50 шақ­та адам болатыны айтылған. Әр сапарында қатар жатқан үш ау­данды қамтитын «Руха­ни керуен» жақында ғана Райымбек, Панфилов, Ұй­ғыр аудандарын аралап қайт­ты. Жамбыл ауданынан бас­тал­ған керуеннің алдында әлі талай жол жатыр. Бұл жоба 17 қарашаға дейін жалғасатын болады.

 Алмас НҮСІП,

«Егемен Қазақстан»

 Алматы облысы