ОҚО-да 480 отбасы қоныс тойын тойлады
<p>«Үйі жоқтың күйі жоқ» дейді ха­лық даналығы. Оң­түстік Қазақ­стан облысында пә­­тер кезегінде тұр­­ғандар көп. Күр­меулі мәсе­ленің түйіні бірер жылда шешіл­мейтіндігі белгілі. Сондықтан әр аудан, қала өз мүм­кін­діктеріне қарай тұр­ғын үйлер салып, тарыққан жандардың сауабын алып жатыр. </p>
Тәуелсіздік күні қарсаңында Төле би ауданындағы 480 отбасы баспаналы болды. Бес қабатты 8 тұрғын үй «Нұрлы жер» бағдарламасы бойынша салынған.
Салтанатты шараға облыс басшысы Жансейіт Түймебаев, облыстық мәслихат хатшысы Қайрат Балабиев, «Нұр Отан» партиясы ОҚО филиалы төрағасының бірінші орынбасары Нұрмахан Жолдасов бастаған ресми адамдар қатысты.
Тұрғындарды арнайы мерекемен құттықтаған Оңтүстік Қазақстан облысының әкімі Жансейіт Түймебаев пәтерлердің Елбасының мемлекетке тапсырған бағдарламасы бойынша салынып жатқанын айтты.
– Біздің басты міндетіміз – халықтың әлеуметтік жағдайын жақсартып, сапалы қызмет көрсету. Облыс, аудан орталықтарында, елді мекендерде тұрғын үйлер салынып жатыр. Соның бір дәлелі – бүгін сіздердің аудандарыңыздағы 8 көп қабатты тұрғын үйдің құрылысы аяқталып, 480 отбасы баспанамен қамтамасыз етіліп, қуанышқа бөленіп отыр. Бұл бағыттағы жұмыстар барлық елді мекендерде Елбасымыздың «Нұрлы жер» бағдарламасы аясында және жергілікті, облыстық бюджет есептерінен жалғасын таба бермек, – деді өңір басшысы.
Ол пәтер кілттерін жетім және ата-анасының қамқорлығынсыз қалған балаларға, әскери және бюджеттік мекеме қызметкерлері мен әлеуметтік аз қамтылған отбасыларына салтанатты түрде табыс етті.
Айта кетейік, Төле би ауданы тұрғын үйлердің құрылысына 2016-2017 жылдары облыстық бюджеттен 2 млрд 735 млн 406 мың 084 теңге бөлініп, бүгінде ол толығымен игерілген. Соның нәтижесінде 29 264 шаршы метр тұрғын үй ел игілігіне берілді.
Бақтияр ТАЙЖАН,
«Егемен Қазақстан»
Оңтүстік Қазақстан облысы