Үржардағы үздік үлгі
<p>Үржар аудандық ауруханасының бас дәрігері Жексенбай Тілеуберлинді бұрыннан танимыз. 2013 жылдан бері Үржар аудандық ауруханасына жетекшілік етуде. Төрт қабатты аурухананың іші-сырты күрделі жөндеуден өткен, айнадай жарқырайды. Аурухананың ішкі жағындағы кең алаңды көрсетіп, келер жылы осы жерден «Ана мен бала» саябағын ашамыз дегенде, бас дәрігердің шаруашылық жұмыстарына көңіл бөлетінін аңғардық.</p>
– Мына тұрған ардагерлер бөлмесі аудан әкімі Серік Зайнулдиннің бастамасы бойынша жасалды. Ішіне күрделі жөндеу жасап, теледидар, қажетті жабдықтар орналастырдық. Ауданның өркендеуіне ерекше үлес қосқан қариялар осында орналасып, қажетті ем-домын алады, барлығы тегін. Мына тұрған перзентханаға жаңа қуатты құрал-жабдықтарды орнаттық. Бізде перзентхана, терапия, жансақтау, балалар, гинекология, хирургия, жұқпалы аурулар бөлімі қызмет көрсетеді. Аудандық ауруханада 100 дәрігер, 331 орта буын қызметкер бар. Барлығы 629 адам қызмет етеді. Мекемеге қарасты 39 емдеу-сауықтыру орындары, 16 медициналық пункт, 6 фельдшерлік-акушерлік, 15 дәрігерлік-амбулатория, Таскескендегі орталық аурухана, Мақаншыдағы ауданаралық орталық аурухана өңірдің 80 мыңнан астам адамына медициналық қызмет көрсетеді, – дейді бас дәрігер.
Аурухананы аралап шыққанда тазалыққа ерекше көңіл бөлінетінін аңғардық. Сырқат жандар жататын палата тап-таза. Кең әрі жарық палаталарда 2-3, 4-5 кісі ғана жатады.
Бас дәрігердің айтуынша, соңғы екі-үш жылда «Парыз» қоры бойынша 148 миллион, облыстық бюджеттен 30 миллион теңге қаржы бөлініп, заманауи аппараттар сатып алуға жұмсалған көрінеді. Ал ол қандай қондырғылар дегенге келсек, тек Астана мен Үржарда ғана бар іш құрылысы (видеогастро) және короноскопия аппараттары. Жансақтау бөліміндегі наркоз беретін қондырғы Оңтүстік Кореядан әкелініпті. Оның бағасы – 12,5 миллион теңге. Рентген аппараты – 6 миллион, жаңа айтылған қос жабдыққа 11,5 миллион теңге жұмсалған көрінеді. Оның сыртында жүкті әйелдерді, асқазан, басқа да сырқаттарды тексеретін УЗИ қондырғыларына қыруар қаржы жұмсалған.
– Елбасының «Болашаққа бағдар: рухани жаңғыру» мақаласында ел азаматтарының сергек те саламатты өмір сүруі жайлы ерекше айтылған. Аурухана қызметкерлері мақала жарияланысымен оны қызу талқылады. Ауданда жаңа туылған сәбилердің соңғы жылдары көбейгені сөз болды. Бізде ай сайын 55-60 сәби дүниеге келеді, бір жылда 730 бала туған. Былтыр 600-дей сәби дүниеге келді. Оның үстіне аурухананы жөндеуге, кір жуатын орынға, қазандық орнатуға, қалдық заттарды тазартатын қондырғыға 270 миллион теңге жұмсалды.
«Дипломмен – ауылға!» бағдарламасы бойынша соңғы төрт жылда 38 дәрігер Үржар ауруханасына қызметке орналасқан. Аудан әкімінің гранты бойынша 21 бала Семей медициналық университетіне оқуға түсіпті. Биыл 10 жас маман туған ауылына келіп, қызметке орналасты. Жолдамамен келгендерге 158 мың теңге көтерме сыйлық, пәтер беріледі. «Дипломмен – ауылға!» бағдарламасымен келген Қымбат Мұсаева қазір бөлімше меңгерушісі болса, Алматыдағы Асфендияров атындағы медициналық университетті бітіріп келген Марсель Алиев терапевт болып қызмет етуде. Олар өздеріне барлық жағдайды жасаған аурухана басшысына риза.
Оңдасын ЕЛУБАЙ
Шығыс Қазақстан облысы,
Үржар ауданы