Жолбарысты жүгендеген әулет Алматыда өнер көрсетеді

Багдасаровтардың цирк­тен ажырамаған айшықты тағдыры нағашы аталары Ни­колай Язевтен бастау ала­ды. Одан кейін өз әке­лері Михаил Багдасаров та жануарларды жақсы көр­гені соншалықты, түбін­де аң үйретуші болып шы­ғады. Цирк сахнасының қал­тарыстарында униформис­терге қолынан келгенше жанаса жүріп, талай қызықты бастан өткерген Михаилге күндердің күнінде арманына бір табан жақындаудың сәті түседі. Маргарита На­за­­ро­­ваның Рада деген жолба­рысы тордан шы­ғып ке­тіп, жай­барақат отыр­ған бір әртістің гример бөлме­сінен бір-ақ шығады. Қорқыныштан өліп қала жаз­даған әртіске көмекке ұмтылған униформистердің ішінде жүрген Багдасаров осы жолы ерекше көзге түс­се керек. Жүрекжұтқан жас баланың қайсарлығына тән­ті болған Назарова кейін ол 18 жасқа толғанда аттракционға алуға уәде бе­ре­ді және сол сөздің үдесі­нен шығады.

Одан кейін Багдасаровтың өзі де бірден жолбарысты жуа­сы­та алмаған. Ресей Ха­лық әртісі атанғанға дейін көп жұ­­мыс істейді. Алдымен «За­бав­­ные ослики» нөмірімен дарала­нып, есектің есті хай­уан екенін дәлелдейді. Михаил тек 1979 жылы ғана 18 уссури жолба­рысын жетектеп, қызы Каринаның көмегімен цирк манежінде салтанат құрады. «Жолбарыстар шоуына» екі жылдан кейін ұлы Артур қосылады.

Міне, сол Багдасаровтың ұлы мен қызы бүгінге төрт­күл дүниеге танымал болған цирк­тің бел баласына айналып отыр. 

Алдағы күндері Алматы­дағы Қазақ мемлекеттік цир­кінде Мәскеудегі Никулин циркімен бірге өнер көрсе­тетін апалы-інілі дарындар алдымен қаладағы балалар үйлеріне, арнаулы ор­та­лық­тарға барып, кіш­кентай көрер­мендердің көңілін ауламақ.

Багдасаровтар балалар үйлеріне тек жолбарыстарын ғана жетектеп апармайды. Балақайларға арналған шеберлік дәрістерінде жан-жануарлардың тілін түсінуді, мінез-құлқын игеруді үй­ретеді. 

Жаһанда жыртқыштармен жұмыс істейтін ер-азаматтар аз емес. Ал 18 жасында 18 уссури жолбарысымен бірге үл­кен цирктің манежіне шыққан Каринаның өнер жолы шынында да дара. 

Артур мен Каринаның әке­сі қырық жыл бойы жол­барыс, ілбіс, арыстан­ды ауыздықтай отырып, қайталанбас трюктер тудыр­ған әулет. 12 жасынан бас­тап әкесімен бірге есекті би­лет­кен Артур да, 16 жасынан жолбарысты ырқына бағын­дырған Карина да әлі күнге дейін әлемдегі ең жас аң үй­ретушілер санатында. Апалы-інілі Багдасаровтар бір жағынан цирктің жан-жануарларға қатысты жанрында, хайуандарды ұрмай-соқ­пай, адамгершілікпен жұ­мыс істейтін жұп саналады.

Айнаш ЕСАЛИ,

«Егемен Қазақстан»

АЛМАТЫ