Қызылордада жылына 1 млн тонна цемент өндіреді

«Гежуба Шиелі Цемент» ЖШС зауыты жобасының жалпы құны – 64 млрд теңге. Бас мер­­дігері «Чайна Триумф Интер­нэшнл» – әлемдегі үздік 50 халық­ара­лық көшбасшы компания қа­тары­на жатады. Зауыт толықтай іске қо­сыл­ғанда мұнда 300-ге жуық жұ­мыс­шы еңбек ететін болады.

Зауыт жылына 1 млн тонна тампонажды цемент өндіреді деп күтілуде. Тампонажды цемент атом өнеркәсібі мен мұнай-газ саласында үлкен сұра­нысқа ие екен. Көптеген кәсіп­орын­дар шикізаттың өзіміз­дегі қат түрін алыс жерден тасы­мал­­даған­дықтан өнімі қым­бат­қа түсе­тін. Мәселен, оңтүс­тік­тегі ашы­луынан жабылуы тез «Керамо­гранит» зауыты өн­діріске қажетті құмды Украина­дан алдыратындықтан тұралап қал­ған болатын. Ал мұнда шикі­зат іргесінде орналасқан. Бүгінде доломит, құм және уақ тас карьер­лері пайдалануға дайын бол­ған­дықтан зауыттың цементі қол­жетімді болмақ.

Зауыт құрылысына 50 гектарға жуық жер бөлінген. Оның 4 гектар жеріне жұмысшылар қала­шығы салынып жатыр. 

Жоба қазақстандық-қытайлық 51 жобаның тізіміне кірген. Шиелі ауданы әкімінің орынбасары Болатбек Ысмағұлов зауытта жұмыс істеп жатқандардың дені жергілікті тұрғындар екендігін айтады. Кәсіпорын толық іске қосылғанда 230-дай адам толық жұмыспен қамтылады екен. Оның 90 пайызға жуығын жергі­лікті халық құрайды.

«Геджуба – Шиелі цемент» өн­ді­­рісінің директоры Уджун Хуа там­по­нажды цементтің әлем­дік на­р­ықта бәсі жоғары екен­дігін ай­т­а­ды. Шикізаттың 98 пайы­зы осын­­­да бар. Тек бір-екі па­йыз қос­­­па­­­­лары ғана сырттан тасымалданады.

Әдетте, жұрт өндіріс орнының ауаға шығарған қалдықтарынан зәрезап болады. Осыдан бес-ал­ты жыл бұрын «Састөбе цемент» зауытының мұржаларынан шыққан қалдықтар жергілікті жұрт­тың үй-жайын басып, ас­пан­нан шұға емес, цемент жау­ғаны­на наразы болған тұрғындар ре­спуб­ликаға дабыл көтерген болатын.

Ал жаңа технологиямен жаб­дықталған бұл зауыттың ерек­шелігі – қоршаған ортаны ластамайды делінеді. Мұржалардан бөлінетін көмірқышқыл газы ар­наулы сүзгіден өтіп тазаланады. Зауыт басшылығы жүзге жуық қазақстандық жастарды Қытай­дағы арнаулы оқу орындарында даярлап жатыр.

Қызылорда облысының әкімі Қырымбек Көшербаев Шиелі ауданына барған сапарында сол жастардың алғашқы легімен кездескен болатын.

ҚХР-да цемент зауытында жұмыс істеу үшін өндірістен өткен жастардың қатары алдағы уа­қыт­та көбейеді. Қытайда 5 мың­нан астам зауыт бар екен. Шиелі ауда­нындағы индустриалды-аг­рар­лық колледжде білім алған жас­тар жаңа өндіріс орнындағы ма­ман­дықты игергендігін айтады.

Әлемдік нарық жағдайында өз көрпеңді қымтап, томаға-тұ­йық өмір сүру мүмкін емес. Ірі өндіріс ошақтары болмаса мем­лекет болашағы бұлыңғыр күйінде қалады. Елбасы әлемдегі бәсекеге қабілетті озық отыз елдің қатарына еркін кіру үшін үлкен тәуекелге бел буып, шетелдік ин­вес­­торлардың көмегімен мем­ле­­ке­тімізді нығайтуға күш са­лып жатыр. Аймақ басшысы осы істе жастарымыздың өндіріс­те жұмыс істеуі аса маңызды екендігін айтты.

Жыл соңына дейін толық іске қосылатын зауытқа мемлекеттік-жекешелік әріптестік шең­берін­де электр желісімен жаб­дық­тау және теміржол салу жұмыс­та­ры жүргізіліп жатыр. Соны­мен қатар облыстық бюджеттен өнер­кәсіптік аймаққа газ құбы­рын салу үшін қаражат бөлінді. Шығарған өнімнің жетпіс пайызын отандық атом өнеркәсібі мен мұнай-газ саласына береді, артылғанын шетелге экспорттайды. Сәтін салса, «Қызылорданың Швейцариясы» атанған ауданда республикадағы ең ірі кәсіпорындардың бірі қанатын кеңге жаймақ.

Бақтияр ТАЙЖАН,

«Егемен Қазақстан»

Қызылорда облысы