Алматыда ережесіз жекпе-жектен жарыс өтеді
<p style="text-align:justify">21 желтоқсанда «Алматы Арена» спорт кешенінде ережесіз жекпе-жектен «Titan FC 51» деп аталатын халықаралық турнирі өтеді. Айтулы жарыста Қазақстан, Бразилия, Қытай, АҚШ, Канада және тағы басқа елдердің келген мықты спортшылары күш сынасады.</p>
Алматы қаласы әкімдігінің қолдауымен өтетін әлемдік доданың ұйымдастырушылары аралас жекпе-жектен халықаралық «Titan FC» ұйымы мен «Alemfighters» клубы болып табылады. Турнир файткардына екі титулды жекпе-жек кіріп отыр. Атап айтсақ, 57 кило салмақтағы чемпиондық белбеуді колумбиялық Хуан Пуэрта (15-6) мен қазақстандық спортшы Қазыбек Әшімов (13-3) сарапқа салады. Ал бұл кештің басты жекпе-жегінде Бейбіт Назаров (14-3) пен америкалық Мартин Браун (12-5) айқасады. Олар жеңіл салмақта (70,3 кг) уақытша чемпиондық белбеу үшін талсады.
Алматыда өтетін жарыс барысында 15 жекпе-жек өткізуді көздеп отырмыз. Рейтингтік бәсекелерде негізінен «Alemfighters» клубының жауынгерлері жұдырықтасады. Өздерін жақсы қырынан көрсеткен жігіттер «Titan FC» лигасына қабылданады. Сол лигада жүріп көзге түскен спортшылардың 70 пайызы UFC-де бақ сынап жүргені баршаға мәлім. Олай болса, біздің өрендер үшін де әлемнің ең белді ұйымында өнер көрсетуге тамаша мүмкіндік туындап отыр, – дейді «Alemfighters» клубының басшысы Ардақ Назаров.
Ғалым СҮЛЕЙМЕН,
«Егемен Қазақстан».
АЛМАТЫ