Ауғанстанның алуан айшықты әлемі
<p style="text-align: justify;">Жуырда Орталық мұражайға бас сұғып тағдыры қатпарлы Ауған елінің тарихынан хабар беретін айрықша көрме-жәрмеңкесін тамашалаудың сәті түсті. Көрерменнің ықыласына бөленген айтулы көрмені Алматыдағы Ауғанстан Ислам Республикасының Сауда атташесі, Ауғанстанның Сауда және индустрия министрлігі және Іскер әйелдер қауымдастығы бірлесе ұйымдастырған.</p>
Ауған елі ежелден қолөнер шеберлерімен ерекшеленеді. Аталмыш көрмеге Ауғанстанның таңдаулы қолөнер шеберлерінің қолынан шыққан үздік бұйымдар ұсынылды. Олардың сапынан ағаш ою, жиһазды әрлеу өнері, гравюрамен безендіру, металл құмыралар, зергерлік әшекейлер секілді өнер туындыларын кездестірдік. Әр бұйымның өзіне тән тылсымы бардай. Әсіресе мыс және қоладан соғылған ыдыс-аяқтар мен арнайы тұрмыстық рәсімдерге арналған бұйымдар таңғалдырмай тұрмайды.
Көрмеде ауған елінің 30 іскер компаниясы жеңіл өнеркәсіп саласы бойынша өз өнімдерін ұсыныпты. Атап айтқанда, қолдан тоқылған әйгілі ауған кілемдері, декоративті кестелер, киім-кешек, маталар, керамикалық бұйымдар, жібек кілемдерге сән берген әртүрлі геометриялық көгеріс өрнектер сол халықтың тарихынан сыр шертіп тұрғандай әсерге қалдырады.
– Танымы сан алуан түрлі халықтардың дәстүрін бір-біріне жақындастыра түсетін мұндай көрмелер музей қабырғасында жиі ұйымдастырылып тұрады. Бүгінгі көрменің басты ерекшелігі – тағдыр жолында талай қиындықты басынан өткерсе де мойымаған ауған елінің қайсарлық келбеті өнер арқылы дәріптелді. Ән мен жырға, дәстүр мен мұраға бай ауған халқы ежелден өнерлі жұрт. Қазақ көрермендері көрмені жылы қабылдады, – дейді Орталық музейдің баспасөз хатшысы Сұлушаш Ағелеуова.
Расында да ауған әуездері көрмеге келген көрерменге самал боп есіп, көңілімізді тебірентіп тұрды.
Сапарбай ПАРМАНҚҰЛ
АЛМАТЫ