«Оскар» жеңімпаздары анықталды
<p style="text-align: justify;">Әйгілі Dolby Theatre сахнасында Америка киноакадемиясының көптен күткен «Оскар» жүлдесін тап­сыру салтанаты өтті. Оң­түс­тік­­кореялық режиссер Пон Чжун Хо­­ның «Па­разиттер» картинасы «Үз­дік фильм» номинация­сы бойын­ша озық деп танылды. Ағылшын ті­лі­нен өзге тілдегі картинаның мұ­н­да­й айтулы жүлдеге тұңғыш рет ие болуы да айрықша жа­ңалық болып отыр.</p>
«Паразиттер» – триллер элементі бар драмалық форматтағы ерекше фильм. Режиссердің өзі айтпақшы, «клоундарсыз комедия немесе залымдарсыз трагедия». Күліп отырып қайғырасың, сөйте тұра зәрең зәр түбіне кетеді. Үмітке алдаусыратқан үрей бір сәт те тынығуға мұршаңды келтірместен қуалай береді. Әдемі көрініс пен өмір рақатын сезініп, бой жазып керілетін уақыт емес, қайткен күнде тірі қалудың амалын табу. Бей-берекетке толы тұманды, таласты, тартысты күндер дәл осы күні басын тауға да, тасқа да ұрған адамзат басынан өтіп жатыр. Картинада бай және кедей отбасылардың мысалы негізінде әлеуметтік теңсіздік мәселесі көтеріледі. Ал фильм режиссері Пон Чжун Хо «Үздік режиссер» сыйлығымен марапатталса, көпшілікті дүр сілкіндірген фильм бұған қоса «Үздік шетелдік фильм» және «Ерекше сценарий» аталымдары бойынша жеңімпаз деп танылды.
Барлығы 24 аталым бойынша табысталған «Оскар» сыйлығының «Жылдың үздік фильмі» номинациясы бойынша биыл тоғыз туынды – «1917», «Паразиттер», «Ирландық», «Бірде …Голливудта», «Джоджо атты қоян», «Неке хикаясы», «Кішкентай әйелдер», «Ford Ferrari-ге қарсы» және «Джокер» фильмі сынға түскен. «Үздік әртіс» аталымы бойынша «Джокер» фильмінде бас кейіпкерді сомдаған Хоакин Феникс, «Үздік әйел рөлі» аталымы бойынша «Джуди» фильмінде ойнаған Рене Зеллвегер ие болды. «Бірде …Голливудта» фильміне түскен Брэд Питт «Екінші пландағы үздік актер» жүлдесімен марапатталды. Бұл Брэд Питтің алғашқы олжасы емес, оған бұдан бұрын 2014 жылы «Құлдықта өткен 12 жыл» фильмінде продюсерлерінің бірі ретінде «Оскар» сыйлығы тапсырылған болатын.