Аумақтық әскери бөлімшелер құрылды
<p style="text-align: justify;">Президент жанындағы Орталық коммуникациялар қызметінің алаңында Қазақстан Қарулы Күштері Бас штабы бастығының орынбасары Серік Боранбаев Қарулы Күштердің аумақтық әскерлерін жасақтау мақсатында әскери міндеттілерді арнайы жиындарға шақыру барысы туралы брифинг өткізді.</p>
С.Боранбаевтың айтуынша, Мемлекет басшысы Қасым-Жомарт Тоқаевтың «Әскери міндеттілерді арнаулы жиындарға шақыру туралы» Жарлығына сәйкес, бүгінде Нұр-Сұлтан, Алматы қалалары мен Ақмола, Алматы, Қызылорда және Павлодар облыстарында аумақтық әскери бөлімшелер құрылды.
Сондай-ақ Ақтөбе және Атырау облыстарында әскери міндеттілерді шақыру жалғасуда. Шымкент қаласы мен Қарағанды облысында әскери бөлімшелерді жасақтаудың басталуы 13 сәуірге, Солтүстік Қазақстан облысында – 14 сәуірге, Жамбыл облысында – 15 сәуірге, Түркістан облысында 17 сәуірге жоспарланған.
– Қорғаныс министрлігі тарапынан алдын ала қабылданған ұйымдастыру-техникалық сипаттағы шаралардың, сондай-ақ карантиндік шектеулердің күрделі жағдайларында жергілікті әскери басқару органдары мен медицина қызметкерлерінің үйлесімді жұмысының нәтижесінде қысқа мерзімде арнайы жиынға – 473 әскери міндеттіні, соның ішінде 71 офицер мен 402 сержантты, запастағы сарбаздарды шақыруға мүмкіндік берді, – деді С.Боранбаев.
Жергілікті әскери басқару органдарына ерікті түрде шақырылу үшін 2372 жас азамат өтініш білдірді. Ал әскери міндеттілердің орташа жасы қазіргі уақытта 27,5 жасты құрайды.
Әскери міндеттілердің 34%-ы жұмысқа орналастырылды. Олардың орташа еңбекақысы – 82 000 теңге. Қорғаныс министрлігінің басшылығы әскери полицияны тарта отырып, әскери міндеттілерді шақыру барысына, санитарлық-гигиеналық нормалардың, әскери тәртіптің сақталуына жүйелі бақылау ұйымдастырды. Халыққа арнаулы жиындарға шақыру шарттарын жедел түсіндіру үшін Қорғаныс министрлігі мен қорғаныс істері жөніндегі өңірлік департаменттерде 4 сәуірден бастап тәулік бойы 18 Call-орталық жұмыс істейді.