Келесі қарсылас – Израиль
<p style="text-align: justify;">Футзалдан Еуро-2022 додасының іріктеу кезеңіндегі Қазақстан құрама­сының соңғы қарсыласы анықталды. Екі ойын қорытындысы бойынша Кипрден басым түскен Израиль ойыншылары Қазақстанмен бір топта өнер көрсететін болды.</p>
Футзалдан Қазақстан құрамасы бұған дейін Мажарстан және Беларусьпен бірге 5-топта ойнайтыны белгілі болған еді. Айта кетейік, 2020 жылғы әлем чемпионатына іріктеу кезеңінде сәтті өнер көрсетуінің арқасында Қазақстан құрамасы автоматты түрде Еуро-2022 іріктеуінің үшінші топтық кезеңіне жолдама алған болатын. Еуро-2022 іріктеу кезеңінің топтық ойындары 6 желтоқсанда басталып, 2021 жылдың 14 сәуірінде аяқталады. Іріктеу матчтары биыл бірінші рет «үй – қонақ» жүйесінде өтеді.
32 команда 8 топқа бөлініп, 15 жолдама үшін бақ сынайды. Топта бірінші орын алған сегіз құрама және екінші орындағы ең үздік алты команда Еуропа чемпионатына тікелей жолдама алады. Сондай-ақ соңғы жолдаманы топта өзгелерге қарағанда нашар ойнап, бірақ екінші орын алған екі команда өзара сарапқа салады. Еуропа чемпионаты 2022 жылдың 19 қаңтары мен 6 ақпаны аралығында Нидерландта өтеді.